Жүлдегер қаламгерлерге құрмет көрсетілді

Республикалық «Алтын көпір» аудармашылар байқауы таяуда мәресіне жеткен болатын. Байқау Қазақстан мен Ресей Федерациясы арасындағы әдеби-мәдени байланыстарды нығайтуды, тілдік мәдениетті дамыту, таратуды, қазақ әдебиетін насихаттауды көздейді. «Алтын көпірде» қостанайлық авторлар да жүлдегерлер қатарынан көрінді. «Поэзия. Қазақ тілінен орыс тіліне аудару» аталымы бойынша ақын Ақылбек Шаяхметтің «Ақсұлу» драмалық поэмасын аударған Әбдірахман Досов бірінші орынға ие болды. Ал, «Поэзия. Орыс тілінен қазақ тіліне аудару» аталымы бойынша Арсений Тарковскийдің өлеңдерін тәржімалаған Ақылбек Шаяхмет екінші жүлдені жеңіп алды.

Күні кеше қос жүлдегердің құрметіне Л.Толстой атындағы облыстық кітапхананың қонақжай залында «Қос жеңімпаз қаламгер» атты кездесу ұйымдастырылды. Оларды құттықтауға қостанайлық ақын-жазушылар, ЖОО студенттері, жергілікті БАҚ өкілдері келді. Қос жазушыларға қаламдастары жылы лебіздерін жолдады. Кітапхана директоры Д.Дүйсебаева да өз құттықтауын айтып, ақындарға жергілікті ақын-жазушылардың туындылары топтастырылған «Тобыл толқындары» әдеби альманахының соңғы шығарылымын сыйға тартты. Авторлар да байқау қорытындысы бойынша жарық көрген «Алтын көпір» аудармалар кітабының 2 томын, мұқабасына қолтаңбаларын қалдырып, кітапхана қорына табыс етті.