Жәрмеңке жалғасын тапты
Қостанайлықтар үшін әдеттегідей ауыл өнімдерінің жәрмеңкесі өтті. Екінші рет өткізіліп отырған жәрмеңкеге қойылған тауарлар пышақ үстінен бөлініп әкетілді.
Ауа райының қолайсыздығына қарамастан жиылған жұрттың қарасы қалың болды.Жәрмеңкеге қала маңындағы елді мекендерден арнайы келгендер де бар. Нарықтағы бағадан әлдеқайда арзан бағаға сатылған азық-түліктің мол қорын қамдап алуды жөн көрген.
Қостанайлық тауар өндірушілердің өнімін сатып алушылар қатарында отбасылы кісілер ғана болған жоқ. Ашөзек студенттер де көзге шалынды. Әмияны жұқа жастар да азық-түлікті арзанға осы жәрмеңкеден алып кетуге келіпті.
Мәселен, Ақтөбеден келіп осында білім алып жүрген Дәуренбек жатақханада тұрады. 1 курста оқиды. Азын-аулақ ақшасына айлық талшығын алып кетуге келген. Ескерте кетейік, жәрмеңке әр сенбі сайын жалғасын тауып отыратын болады.
Кенже ҚОНЫСБАЙ
Суреттерді түсірген Бағдат АХМЕТБЕКОВ
