Төлегеновтерге сәт сапар!
Күні кеше Төлегеновтер отбасы «Мерейлі отбасы» байқауының республикалық кезеңіне қатыспаққа жол тартты. Естеріңізге сала кетейік, тоғыз бірдей жетімді асырап отырған тағылымды шаңырақ иелері аталған байқаудың облыстық кезеңінде топ жарған болатын.
Қостанай ауданына қарасты Альжанов ауылында тұратын отбасы Мәскеу-Астана бағытындағы пойыздың қозғалуына сүт пісірім уақыт қалғанда вокзалға келіп жетті. Вокзал басынан күтіп алған жергілікті тілшілерге Төлегеновтермен сапар алдында сұхбаттасудың орайы келмеді. Отарбаға асығыстау мінген отбасының соңынан ере кіріп, суретке түсіріп, сәт сапар тілесуге ғана үлгердік…
Төлегеновтер өздерімен бірге жеті жеткіншектерін ертіп апара жатыр. Шарт бойынша әр отбасы, әрі кеткенде, 3 баламен ғана сайысқа қатысуы керек екен. Дегенмен, Гүлжауһар ханым ұйымдастырушылардан рұқсат алғанын айтады.
-Мұндағы мақсатым – балаларыма ел-жер көрсетіп, өнер мен өнеге орта толтыратын шараға кішкентайларымды куәгер ету. Бұл да біздің олардың санасына сіңіріп жүрген тәлім-тәрбиемізді жетілдіре түсуге ықпал жасарына сенімдімін,-дейді Гүлжауһар ханым.
Облыстың намысын арқалап бара жатқан отбасы барынша дайындалғандықтарын, жеңіс тұғырынан көріну үшін тырысатындықтарын жеткізді. Қазақстандағы ең «Мерейлі отбасыны» анықтау халықтың дауысы арқылы шешілетіндіктен, жерлестерден қолдан келгенше қолдау білдіруді сұрайды.
Айта кетейік, Төлегеновтерге дауыс беру үшін www.kaztube.kz сайты арқылы немесе Kcell, Beeline, Altel, Tele2 мобильдік операторлары арқылы 6284 қысқа нөміріне СМС арқылы және 8-803-080-00 телефон нөмірлері арқылы дауыс беруге болады. Жерлестеріміздің реттік нөмірі – 11.
Жандос Жүсіпбек
