“ЕЛДІКТІҢ АСЫЛ ТІРЕГІ – АТА ЗАҢ!” осындай атаумен мерекелік концерт өтті

Ата Заңға – 20 жыл! Бұл, тарихи бағаммен дөңгелектегенде, аса көп те уақыт емес. Дегенмен, осы жылдар ішінде егемен елдің еңсерген еңістері ересен. Коституция – дамушы мемлекеттің шыңға шығандауының басты кепілі, тәуелсіздіктің тұтқасы, бірлік-берекенің ұйытқысы. Сондықтан да оның маңызы маңғаз, құны қастерлі. Сондықтан да Конституия күні – мерекелердің төресі.

Елдің түкпір-түкпірінде тойланып жатқан айтулы мейрамды астықты өлке де бүгін сән-салтанатымен атап өтті. Қостанайдың сити-орталығында қала тұрғындары мен қонақтарына арналып "Елдіктің асыл тірегі – Ата Заң" атты концерттік бағдарлама қойылды.

Е.Өмірзақов атындағы облыстық филармонияның өнерпаздары мерекелік концерт шымылдығын әсем ән-күймен ашып берді. Мәдениет қайраткері А.Бубеньконың жетекшілігіндегі Республикадағы бірегей муниципальді үрмелі аспаптар ансамблі көрермендерді әуелеген әуезді әуенге ұйыта білді.

Қалалық мәслихат хатшысы Н.Халықов сахна төріне көтеріліп, қостанайлықтарға құттықтау лебізін жеткізді. Ізінше «Мирас» ұлттық ансамблі патриоттық әндерден шашу шашып, көркем мейрамның көрігін қыздырды.

Жиналғандар өзге де жас дарынды әртістердің өнеріне қарық болып, тәнтілік танытып, қошемет білдірді.

Айта кеткен жөн, мереке бұл концертке дейін «Конституция жаңа дәуірдің бастауы» атты тағылымдық іс-шарадан басталды. Одан бөлек, түрлі мекемелерде «Құқығым бар» атты ойын-турнирлер ұйымдастырылды. Негізгі салтанатты шарада қоғамның дамуына қызмет еткен облыстағы майталман мамандар марапатталды. Сондай-ақ, таңғы сағат 10.00-де зиялы қауымның қатысуымен «Ел тарихы» атты кездесу ұйымдастырылды. Онда Зайырлы мемлекеттің бас құжатының тарихы әңгімеленді.