«Мақтанышым – Астанам»

Міне, осындай тақырыпта Қостанай қалалық орталықтандырылған кітапхана жүйесінің құрылымдық бөлімшесі №6 «Южный» кітапхана филиалы мамандары еліміздің бас қаласы – Астанаға вертуалдық саяхат жасау түрінде іс-шара ұйымдастырды. Іс-шараға кітапхана оқырмандары мен № 19,20,23 орта мектептері жанындағы жазғы сауықтыру демалыс лагерінің оқушылары қатысты.

– Бүгінде біздің Астанамызды әлем таниды деп мақтана аламыз. Жылдан жылға құлпырып, әсемденіп, салтанаттанып келеді. Сондықтан да жас ұрпақтың, оқушылардың бойына қазақстандық патриотизмді сіңіру, еліне, жеріне деген сүйіспеншілікті ояту, өз елінің тарихын, мәдениетін танып-білуге, зерттеуге жетелеу мақсатында, сол секілді Астана қаласының көркем, салтанатты, көрікті орындарымен таныстыру үшін балаларға қызықты әрі тартымды болу үшін бейнекөріністер көрсету арқылы вертуалдық саяхат жасау форматын таңдадық. Балалар бейнекөріністі, бейнероликті көре отырып, Астананың көрікті орындарын кәдуілгі аралағандай әсерде болары сөзсіз. Кітапханшыларымыз Астанаға вертуалды саяхат жасап, мысалы, еліміздің атақты үш Төле, Әйтеке, Қазыбек биіне, халқымыздың бас ақыны Абай Құнанбаевқа, атақты ханымыз Кенесарыға арналған ескерткіштерімен, сонымен қатар Хан шатырына, «Қазақ елі» монументіне, «Астана-Бәйтерек», «Отан-Ана» кешендеріне саяхат жасады, қаланың көрікті көшелері, гүлзарлары, субұрқақтарымен таныстырды, қысқаша мәлімет те беріп, сұрақтарын да қойды,-деді бізге кітапхананың меңгерушісі Қымбат Сокурова.
Іс-шара барысында Астанаға арналған слайд та көрсетілді, жыр да оқылды.
– Астана сондай әдемі қала. Аралап, қыдырып жүре бергің келеді. Тура ертегідегідей керемет. Мен Астанаға бірнеше рет қыдырып бардым. Сондай астанамыздың бар екеніне қуанамын. Әсіресе, маған Бәйтерек, Хан шатыры, Думан ұнайды. Бәйтеректің сырты да, іші де сондай көркем. Үлкен, алып шарға лифт арқылы көтерілесің. Залға кіріп, Астананы түгел көруіңе болады. Білесіз бе, Бәйтеректің биіктігі 97 метр. «Аялы алақанға» қолымды мен де қойдым,-деді бізге М.Хәкімжанова атындағы №20 орта мектебі даярлық тобының оқушысы Нұрдана Сәрсенбаева.

Гүлназым Сағитова
Суретті түсірген Айбек Жүзбай