ШАҺАРДАҒЫ ШАТТЫҚ КҮНІ
Бүгін қаланың әр бұрышында әсем ән әуелеп, күй қалықтап тұр.
Орталықта көркем безендірілген күркешелер, гүлмен көмкерілген ескі автокөліктер, гүл-мүсіндер «мен мұндалап» тұрды. Қостанайдың туған күнін тойлап жатқан тұрғындар мен қала қонақтары мерекелік көңіл күйде.
Облыс әкімі Н.Садуақасов барша қостанайлықтарды айтулы мерекемен құттықтады.
Қала өнерпаздары дайындаған «Туған күніңмен, Қостанай» атты концерттік бағдарлама биылғы жылы ерекше болды. Себебі, ән салып, би билегендердің басым көпшілігі– қала тұрғындары. Мәселен, «Карнавал» би ансамблінің «көше биі» жиылғандардың алғысына ие болды.
Қостанайды төл мерекесімен құттықтауға ежелгі грек аңызындағы кейіпкерлер де келіпті. Мифологиядағы бас әмірші Зевс қаламыздың қарқынына риза болса, Афродита Қостанай сұлулығына қол соқты. Тобылға тамсанған Посейдон да қаланы 136 жасымен құттықтады.
Мерекелік іс-шаралардың легі хот-дог тағамын жасау турнирімен жалғасты. Жастар өздері сүйіп жейтін фаст-фуд түрлерін дайындау мүмкіндігіне қол жеткізді. Ал Астанадан қонаққа келген Санжар есімді жас жігіт те хот-дог жасау жарысына атсалысты.
– Қостанай күнін арнайы тойлауға досыммен бірге келдім. Астықты өлкеге бірінші рет жолым түсіп отыр. Жұрт көңілді. Хот-дог дайындау сайысы арқылы қостанайлық жастармен таныстым. Бүгінгі күндегі қуанышымды сөзбен жеткізе алмаймын, – дейді қала қонағы. Сонымен қатар, қалалық саябақта әдебиетке құмар жандар үшін поэзиялық іс-шара өткізілді. Қостанайлық жас ақындар ару қаламызға өлең шумақтарын арнап, өңірден шыққан белгілі қаламгерлердің шығармалары оқылды. Табиғат аясында өткен тәлімі мол мерекелік шараға Ақылбек Шаяхметов,Серікбай Оспановпен қатар сатирик Бәкеш Айсин және аудармашы Абдрахман Досов сынды танымал тұлғалар мұрындық болды. «Бесік-арбалар шеруі», «Нан мерекесі» мен мергендер сайысы да жұрттың көңілінен шықты. Орталықта «Балалар алаңы» ашылды. Бүлдіршіндерге арналып түрлі ойындар өткізіліп жатыр.
Қостанайдың туған күні ел болып мерекеленіп жатыр. Қала күнін тойлау концерттік бағдарлама және Тобылдың жағасындағы отшашумен аяқталады деп күтілуде.
К.Қонысбай, Қ.Қойшыманов
Суреттерді түсірген Б.Ахметбеков
