“Мирас” мәдени ошағы қостанайлықтар үшін

Қостанайлықтарға жақсы мәдениет сарайы қажет деген әңгіме көптен бері айтылып келді. Осы мәселе шешіліп, қалада “Мирас” қалалық мәдениет үйі есігін көпшілікке айқара ашты. Қуанышты шара халықаралық балаларды қорғау күнімен тұспа-тұс келді. Күрделі жөндеуден өткен ошақтың ішін Н. Садуақасов түгелімен аралап, мұндағы шығармашылық ұжымдармен кездесті.

КЖБИ шағын ауданындағы мәдениет үйінің іші-сырты бұрындары сын көтермейтін. Күрделі жөндеу жүргізу мәселесі осыдан екі жыл бұрын қолға алынды. Қалпына келтіру жұмысына 542 миллион теңге қаржы жұмсалып, өнер ордасы жаңа келбетке ие болды.

 Қазір бұл жерде ересектерге арналған 11 шығармашылық ұжым және балалар студиялары бар. Оның сыртында жастар орталығы да осы жерде бас қосқан. Үйірмеге келетін ең үлкен кісі 75 жаста екен.

Концерт залы 410 орынға лайықталған. Мәдениет ошағында ән жазатын студия қондырғылары толығымен жаңартылды. Бұған барша әншілер риза. Өнер адамдарының тың туындыларына жан бітіруге кең мүмкіндік бар. Ән жазу студиясында Н. Садуақасов алғашқы болып ән салып, даусын жаздырып, студияның мүмкіндігін де сынап көрді. Заманауи аппаратуралармен жабдықталған студия да, жаңартылған ғимарат та облыс әкімінің көңілінен шықты.

 

Айтолқын АЙҚАДАМОВА

Суреттерді түсірген Бағдат Ахметбеков