Елбасының жеңісі – елдің жемісі!

 

26 сәуірде елімізде саяси науқан өтіп, халық президенттікке үміткерлер арасынан өз таңдауын жасады. Біздің аймағымыз да осы шараға белсенді атсалысты. 847 учаскелік сайлау бөлімшелерінде 542,7 мыңнан астам адамның 96,8% дауыс берді. Дүйсенбі күні Орталық сайлау комиссиясының төрағасы Қ.Тұрғанқұлов дауыс беруге сайлаушылардың 95,22% келді десе, Тобыл өңіріндегі көрсеткіштің жоғары екенін аңғаруға болады. Осы орайда облыстық сайлау комиссиясының төрайымы Антонина Маркованың сәт санап жаңа мәліметтерді беріп отырғанын айтпай кетуге болмас.

Енді президенттікке үміткерлердің жинаған дауыс үлесіне тоқталсақ. ҚР ОСК-ның мәліметінше сайлаушылар Әбілғазы Құсайыновқа 0,7%, Нұрсұлтан Назарбаевқа – 97,7%, Тұрғын Сыздықовқа – 1,6 % дауыс берді.

Нұрсұлтан Назарбаевтың сайлауда жеңгені туралы алдын ала қорытынды шығарыла сала, республиканың түкпір-түкпірінде үлкен мерекелік шаралар өтті. Бұл хабарды қостанайлықтар да ерекше қабылдады. Бүгін облыс орталығындағы спорт сарайында аймақ басшысы бастап, өңірдің белгілі азаматтары, «Нұр Отан» партиясы өкілдері, жастар қанаты, студенттер қатысқан салтанатты жиындар ұйымдастырып, халыққа «Елбасының жеңісі – елдің жемісі!» деген ұранмен құттықтауларын жеткізіп, ​жергілікті өнерпаздар елдің рухын көтеретін патриоттық ән-билерін шашу етті.

 

Қыдырбек ҚИЫСХАНҰЛЫ

Суреттерді түсірген Бағдат АХМЕТБЕКОВ.