Өнер адамға табиғатынан дариды

Қаладағы №3 мектептің түлегі, биылғы халықаралық "Алтын микрофон" байқауының жеңімпазы Мұхаммади Жандос ән айтуды алты жасынан бастаған. Ол өзінің өнерін шыңдау үшін көп әншілер секілді кәсіби мамандардан сабақ алып, арнайы студияларда дайындалған жоқ. Ата-анасы да бір қайыратындары болмаса, қарапайым адамдар. Бірақ Жандосқа әншілік өнер тумысынан берілген. Айтпақшы,  оның  ағасы  да әнші екен. Алғаш Жандостың өнерін байқаған да – ағасы.

Ал дарынды баланың талантын ұштап, бүгінгі жетістікке әкелген де №3 мектептің музыка пәнінің мұғалімі екен:

– Ақжамал Башаева мені алтыншы сыныптан бері қалада, облыста,  республикада  өтетін шараларға апарумен келеді. Ұстазыма алғысым шексіз. Ендігі мақсатым – осы өнерімді шыңдау үшін Алматыдағы Т.Жүргенов атындағы өнер академиясына оқысам деймін. Бұл менің көптен бергі арманым, – дейді жас әнші.