Ыбырай ұрпақтары
Мына суретке қараңызшы. Қандай көркем, қандай сұлу! Міне, осындайда Абай атамыз «Жастықтың оты жалындап, Жас жүректе жанған шақ, Талаптың аты арындап, Әр қиянға салған шақ» деген емес пе. Биыл олар он бір жыл бойы білім алған Ы.Алтынсарин атындағы дарынды балаларға арналған мектеп-интернатынан түлеп ұшады. Алда- армандаған арман жолдар, биік асулар. Қай-қайсысынан болмасын бөгелмей, тайсалмай өте шығары сөзсіз. Соның бірі – ҰБТ. Ол емтиханды да ойдағыдай тапсырып, діттеген баллдарын алып, өздері қалаған жоғары оқу орындарына түсіп, білікті жас маман атанып, мемлекетіміздің бір кірпіші болып қаланары ақиқат. Лайым солай болсын!
– Биылғы облыс орталығындағы Ы.Алтынсарин атындағы дарынды балаларға арналған мектеп-интернатының 11 сыныпты бітіретін қырық тоғыз түлектің алтауы мысалы, Эльмира Сауытпаева, Айзат Төкен, Қазбек Сәлімжан, Ұлзада Сәлімжан, Әнуар Отыншин, Абылайхан Ахан «Алтын белгіден» үміткер. Сонымен бірге бірнеше оқушымыз Жанар Қуанышбай, Күлзада Аманова, Кәмила Өмірзақова халықаралық, республикалық білім байқаулары мен сайыстарының жеңімпазы атанып, білім гранттарына ие болып отыр. Студент десе де болады. Біз, ұстаздар, оқушыларымыздың осындай табысқа жеткендеріне, қуаныштымыз. Басқа оқушыларымыз да талапты да білімді. Сынып жетекшісі болу да оңай емес, Жұмаш Бөлекбаева екеуіміз оқушыларымыздың ыстығына күйіп, суығына тоңып, жетістігіне қуанып, кемшілігіне күйіндік. Енді, міне, мектепке тарыдай болып кіріп, таудай болып шығып отыр, – деді бізге өз әңгімесінде мектеп бітіретін түлектердің сынып жетекшісінің бірі Ағыбай Нұғыманов.
Сондықтан да мектепте өткен соңғы қоңырау салтанатына ата-аналар да, қонақтар да көп жиналды. Жетістікке жеткен ұстаздар мен оқушылар марапат пен құрметке ие болды. Салтанатқа жиналғандарды облыстық білім басқармасының жетекшісі Ә.Төртқараева, мектеп директоры Ғ.Қарпықова және тағы басқалар құттықтап, өздерінің жылы лебіздерін білдірді. Күміс қоңырау соғылып, ұстаздардың құшақтары гүлге толды, әсем музыка ойналды.
Гүлназым
САҒИТОВА
Суретте; биылғы түлектер Анар Кенжебаева, Әнуар Отыншин(«Алтын белгіге үміткер»), Шынар Бекежанова, Әділхан Кенжетаев
Суретті түсірген Айбек Жүзбай.
