Өңіріміз психолог мамандарға зәру

Соңғы кездері өз-өзіне қол жұмсау дерегі Қостанай облысы бойынша біршама көбейген. Өткен жылы 54 суицид дерегі тіркелген. Осы арада тоқтала кететін жайт, оның 43-әйелдер, 11-і балалар. Бұл облыстық прокуратурада өткен қоғамдық кеңесте айтылды.

Оның себебі кәмелетке тол­ма­ғандар ара­сындағы өзіне өзі қол жұмсаудың ал­дын алуда уәкілетті органдардың атқар­ған жұ­мыс­тарының жеткіліксіздігі болып отыр. Өзіне өзі қол жұмсауға негізінен от­басын­да­ғы, мектептегі және дос­тары­ның орта­сын­дағы қарым-қатынастар себепші болуда. Облыстық прокуратураның 1-басқарма бастығы А.Сыздықовтың айтуынша, облыс орталығында білім басқармасы жанынан құрылған психологтар ұйымы үшеу.  Жалпы өңіріміз психолог мамандарға зәру. Қазір 40 психолог-педагог маманы жетіспейді. Сонымен қатар, кейбір білім ошақтарында психологтардың орнына басқа пән мұғалімдері қызмет көрсетіп жатқаны анықталып отыр. Мәселен, Ұзынкөл ауданында Бауман орта мектебінде психолог міндетін биология пәнінің мұғалім беріп келген. Осындай дәйектер көптеп кездеседі. Мұның бәрі балаларға тиісті психологиялық көмек берілмейді деген сөз.

Алқалы жиында облыстық білім басқармасы басшысының орынбасары К.Ибрагимовқа білікті маман психологтарды тарту, оқушылардың мектептен тыс тәрбиесін жандандыру және олар­дың бос уақытын тиімді пайда­ла­ну­ды қамтамасыз ету, оларға өмір шын­ды­ғын нақты тұрғыда баға­лау, теріс әсер ете­тін қысымдарға қарсы тұру қабілет­терін қалып­тастыру міндеті жүктелді.

Сондай-ақ облыс прокуроры кәмелетке тол­ма­ғандардың өзін өзі өлтіруге дейін жеткізуі бойынша қозғалған қылмыстық істердің тергелуіне тікелей бақылау жасауды жүктеді. Тал­қы­лау­дың нәтижесінде қоғамдық кеңесте кә­ме­летке толмағандар­дың арасындағы өзіне-өзі қол жұм­сауға бейім мінез-құлық про­фи­лактикасының  жаңа әдістерін, кешенді алдын алу шараларын қабылдау, уәкі­лет­ті органдар мен жұртшылықтың ара­сын­дағы өз­ара іс-қимыл белсенділігін арт­тыру­ды қарастыратын балалар­дың ара­сындағы өзіне өзі қол жұмсаудың ал­дын алуға арналған мемлекеттік бағдар­ла­маны жетілдіру қажеттілігін атап көрсетті.

Шұға ҚОҢҚАБАЙ