Оқу-жаттығу сәтті өтті
Алтынсарин ауданының тас жолында жанармай таситын ауыр көлік өртенді. Ауа райының қолайсыздығы салдарынан көлік жүргізушісі техникаға ие бола алмай, жолдың қарсы бетінде келе жатқан жеңіл автокөлікпен соқтығысқан. Салдарынан бензин толы көлік отқа оранды. Оқиға орнына төтенше жағдайды жою және зардап шеккендерге жәрдем көрсету құтқарушылары, өрт сөндірушілер, Алтынсарин аудандық ТКШ бөлімінің мамандары, медициналық қызметкерлер көмекке келді.
"Қостанай-Қарасу" автожолы бойындағы Большая Чураковка поселкесі маңында осылай жоспарланған арнайы тактикалық оқу жаттығулары өтті. Қостанай облысының ТЖД кезекті жоспары бойынша қар тазартатын арнайы техника арқылы оқиға болған жерге жол-патруль машинасының экипажы да дер кезінде жетті. Өрт сөндірушілер көлікті сөндіруге кірісті. Бұл оқу жаттығуға "Щербаково" трассалық медициналық-құтқару пунктінің жұмысшылары алғаш рет қатыстырылып отыр.
Қостанай облысының ТЖД бастығы Талғат Кәкімов төтенше жағдайлар қызметкерлері кез келген төтенше оқиғаға дайын болу керектігін айтады. Сондықтан осындай оқу жаттығу жұмыстары жүйелі түрде өтіп тұрады. Ал мекеме басшысы бұл жолғы оқу жаттығуға жоғары баға берді.
Суретте: Оқу-жаттығу жүргізу сәті.
