Ержүрек ерлерді еске алды

1979-1989 жылдары аралығында Ауғанстандағы соғысқа Кеңес әскерлері де қатысты. Он жылға жуық созылған соғыстың зардабы тарих беттерінде сайрап жатыр. Әскерге алынған жас жауынгерлер жат қолынан қаза тапты. Із-түзсіз жоғалып кеткен азаматтар қаншама. Қостанай облысы бойынша 1846 адам ауған соғысына қатысқан. Соның 46-сы қайтып оралмаған, екеуі із-түзсіз жоғалды.

Жексенбі күні қостанайлық ауған соғысының ардагерлері қасіретті жылдардың құрбаны болған ерлерді еске алды. Себебі, 15-ақпан – Ауғанстан жерінен Кеңес әскерлерінің шығарылған күні. Еске алу митингі қала орталығындағы Жеңіс паркінде өтті. Аталған жерде ауған соғысының құрбандарына арналған ескерткіш белгі бар. Шараға жиналғандар боздақтардың аты-жөндері жазыл-ған тақтаға гүл шоқтарын қойды.

– Кеңес әскерлерінің ауған  даласынан шығарылғанына биыл жиырма алты жыл. Арада ұзақ уақыт өтсе де аталған соғыстың қасіреті ұмытылған жоқ. Себебі, он жылға созылған шайқаста қандас, бауырларымыздан айырылдық. Олардың ерлігі, есімдері ескерусіз қалмауы керек. Ауған соғысының көзі тірі куәгерлеріне әртүрлі жеңілдіктер жасалуда. Бір өкініштісі, "Ауған соғысының қатысушылары туралы" заң жоқ, – деді Қостанай облысы бойынша Ауған соғысының ардагерлері ұйымының төрағасы Манарбек Сұлтанғазин.

Қымбат

        ДОСЖАНОВА

Суретте: митингтен көрініс.

Суретті түсірген Айбек ЖҮЗБАЙ.