Кәдеге асқан кәсіп

Адамның өзіне ұнайтын, жаны қалаған сүйікті ісі болады. Сол арқылы әркім өзінің қажеттілігін өтейді. Сүйікті іспен қалаған сәтте айналысу демалыстың бір түрі. Ал табыс көзі ретінде бағаласа кәсіпке жатады. Ең бастысы сол істен пайда түсірудің жолын тапсаңыз болғаны.

Алтынсарин ауданының тұрғыны Дәркей Мұхамбетхан қолөнерді жастайынан меңгерген. Бұрындары ісмерлікпен бос уақытында айналысатын. Ал қазір қолөнердің арқасында күн көріп отыр. Қыз жасауы және тұрмысқа қажетті төсек-жабдықтардың алуан түрін жасайды.

«Тәуекел түбі желқайық, өтесің де шығасың» деген бар емес пе. Кейіпкеріміз осынау қағиданы ұстанып, үлкен істі бастағалы қашан. Былтырғы жылдың мамыр айында «Жұмыспен қамту – 2020» бағдарламасы арқылы мемлекеттік грантқа қол жеткізді. Берілген қаржыға тігін машинасы мен қажетті құрал-жабдықтарды сатып алды. Үйінің бір бөлмесін жұмыс істеуге ыңғайлы етіп жасақтады. Бүгіндері тапсырыс қабылдап, тұрғындардың қажеттілігін өтеуде. Этностильдегі жабдықтарға сұраныс баршылық екен. Үшінші топтағы мүгедек осылайша өзін-өзі жұмыспен қамтып отыр.

– Қолөнерді бала күнімнен көріп, біліп өстім. Үлкендерден үйренгенім бір кәдеге асып жатқанына қуаныштымын. Ауылдықтардың тапсырысы бойынша жұмыс істеп жатырмын. Үлгермей қалған сәттері келінім қолғабыс етеді, – деді қолөнер шебері Дәркей Мұхамбетхан.

Қымбат

         ДОСЖАНОВА

Алтынсарин ауданы.