Басты мақсат – сапалы қызмет көрсету
Әр заманның өзіндік ерекшеліктеріне байланысты құжаттар да өзіндік сипатқа ие болуда. Қазір дәстүрлі жазба құжаттармен қатар, өмірге электронды құжаттар ұғымы келді. Бүгінде Қостанай облысының мемлекеттiк мұрағатымен «мұрағаттық анықтамалар беру» мемлекеттiк қызметі көрсетіледі. Бұл қызмет түрі тiкелей мұрағаттар арқылы қолданушылардың жеке өтініштері бойынша, электрондық немесе пошталық байланыс арқылы, сонымен қатар халыққа қызмет көрсету орталықтары және «электрондық үкiмет» веб-порталы арқылы жүзеге асырылады. Сондай-ақ, мұрағат анықтамасын беру қызметі ақысыз негізде жеке және заңды тұлғаларға еңбек өтілі мен еңбек ақы төлемдерінің мөлшерін, жасын, білімі мен біліктілігін, мемлекеттік және ведомстволық сыйлармен марапатталғанын, зейнетақылық жарналар мен әлеуметтік салымдардың аударылуын, ғылыми даңқтар мен деңгейлердің тағайындалуын, емделуде, қамау орындарында болғанын, көшіру мен сауықтыруда, экологиялық апатты аймақтарда, 1941-1945 жылдары Ұлы Отан соғысы кезінде жұмыс істегендігін, азаматтық хал-жағдайлар актілері мен мүліктік құқықтарын растау тәрізді әлеуметтік құқықтық сипаттағы негізде көрсетіледі. Өткен жылы Қостанай облысы бойынша 5820 адамға, соның ішінде, алыс және жақын шетелдік жеке және заңды тұлғалары үшін – 2665, Қазақстан Республикасының жеке және заңды тұлғалары үшін – 3129, «Электрондық үкіметтің» веб-порталы арқылы – 16, халыққа қызмет көрсету орталығы арқылы – 10 қызмет түрлері көрсетілді.
Бүгінде жойылған және қайта құрылған ұйымдар мен кәсіпорындардың жеке құрам бойынша құжаттар санының көбеюіне, сондай-ақ әлеуметтік қамсыздандыру мәселелері бойынша кейбір заң актілеріне енгізілген өзгертулер мен толықтыруларға қатысты, азаматтардың әлеуметтік жеңілдіктер мен өтемақыларға құқығы бар екендігін растайтын әлеуметтік қамтамасыз ету органдарына қосымша анықтамалар ұсыну қажеттілігіне байланысты мемлекеттік мұрағаттарға келіп түсетін әлеуметтік-құқықтық сипаттағы сұранымдардың да саны өсуде. Сондықтан, бұл бағытта мекемелер қызметінің тиімділігі, мерзімді және сапалы қызмет көрсетуі, азаматтардың қанағаттанушылығы маңызды критерийі болып табылады. Осыған байланысты, қазір «мұрағаттық анықтамалар беру» мемлекеттік қызмет көрсетудің сапалы мониторингі мақсатында мұрағатқа жеке өтініш білдіргенде міндетті түрде карточкалар жүргізіледі. 2014 жылы Қостанай облысының мемлекеттік мұрағатымен 3280 өтініш есепке алу карточкалары арқылы толтырылды.
Жалпы, облыстық мұрағатта мемлекеттік қызмет түрін пайдаланушыларға барлық жағдай жасалған. Мүмкіндігі шектеулі жандардың да ғимаратқа емін-еркін кіріп-шығуы үшін пандус орнатылды. Сондай-ақ, мемлекеттік қызметтерді көрсету тәртібі туралы ақпараттар ведомстволық интернет-ресурста, ғимараттың фойесіндегі ақпараттық стендттерде, «электрондық үкімет» веб-порталында, халыққа қызмет көрсету орталығының интернет-ресурсында орналастырылған.
Иә, қазақстандық қоғамның әлеуметтiк-экономикалық жаңғыртуының басым бағыттарының бiрi – халыққа мемлекеттiк қызметтер көрсетудiң сапасын жоғарылату. Сондықтан, жеке және заңды тұлғалардың өтініштерін сапалы орындау – мұрағатшылардың жауапкершiлiгі мен кәсіпқойлығын бағалаудың маңызды критерийі болып табылады.
М.АЛЕКСАНДРОВА,
Қостанай облыстық мұрағатының азаматтардың сұрау салуларымен жұмыс жасау жөніндегі бөлім басшысы.
