Моральдық залал өндіріп берді

Қостанай қалалық соты жәбірленушінің арызы бойынша моральдық залал өтемін алуға қатысты азаматтық істі қарады.

Облыстық соттың баспасөз қызметінің мәлімдеуінше,  өткен жылдың мамыр айында айыпталушы Ф. қаламыздағы Қайырбеков-Киевский көшелерінің бойында келе жатқан жәбірленуші Т.-ға бұзақылық ниетпен дене зақымын келтірген. Нәтижесінде, жәбірленушінің алған зақымына қарамастан сол күні жұмысын жалғастырып, студенттерден емтихан қабылдауына тура келген. Сондай-ақ, ол алған дене жарақатына байланысты емделу үшін дәрі-дәрмекке көп қаражат та жұмсаған. Сондықтан, ол сотта айыпталушыдан моральдық залал өндіріп алу үшін 500 мың теңге талап еткен. Бірақ, сот жәбірленушінің пайдасына Ф.-дан 100 мың теңге моральдық залал өндіріп берді.

Сот шешімі заңды күшіне енген жоқ.

Қарлығаш

   ОСПАНОВА