Сағаға су келді

Шалғайдағы Саға ауылының тұрғындары сапалы ауыз судың рақатын көріп отыр. Өткен жылы шілде айында басталған құрылыс жұмыстары  уақытылы аяқталып, тәуелсіздік мерекесі қарсаңында пайдалануға берілді. Ауыл әкімі Елдос Едіресов бұған республикалық бюджеттен 282 млн. 969 мың теңге жұмсалғанын айтады. Бар жауапкершілікті өз мойнына алған қостанайлық "Строитель-2003" ЖШС  тоғыз шақырымға пластикалық құбыр тартып, бас-аяғы 103 құдық орнатты. Орталықтағы сексен екі үй мен мекемелерге су кіргізілді.

Ауылға су құбыры тартылуымен қосымша жұмыс көздері де ашылды. Құрылыс жүргізу  кезінде отызға тарта жергілікті тұрғындар уақытша болса да жұмыспен қамтылса, қазір су тазарту станциясында оператор, сантехниктен өзге тағы екі адам күзетшілік жұмысқа орналасты.

Мейрамхан Нұрбеков,

су тазарту қондырғысының операторы:

– Негізінен бұл жергілікті су тазарту станциясы заман талабына сай сенсорлық басқару тетіктерімен жұмыс істейді. Сонымен қатар, мембранды технология бойынша жаңа су тазарту қон-дырғылары орнатылған. Мәселен, барлық картриждік сүзгі-лердің атқаратын қызметі темірді жою, суды жұмсарту, суды хлордан тазалау және басқа міндеттерді орындау. Төрт сорғының күшімен мұнараға жиналған су ауылға жіберіледі.

Әзірге жұмыс барысында айтарлықтай қиындық жоқ. Күнделікті ісімізді мұқият қадағалап, халыққа уақытында су жіберіп тұрамыз.

Айжамал Баймырза, 

ауыл тұрғыны:            

– Халықтың денсаулығы осы тіршілік нәріне де қатысты екенін ескерсек, бұл бір қуанышты жағдай болды. Бұған дейін суды өзеннен тасып ішіп келдік. Тазалығына ешкім кепілдік бермейтін. Сонда да жұртшылық көктемде мұз ойып әкеліп әлектенеді. Қазір балаларды қайта-қайта суға жүгіртпейтін болдық. Енді бар өркениет осымен шектеліп қалмаса екен дейміз.

Ауылға ұялы байланыс желісі орнатылып, жолымыз жөнге келсе деген қалауымыз бар. Қызбел ауылы аудандағы халық көп қоныстанған мекеннің бірі ғой, сондықтан да  қолдаусыз қалмас деп ойлаймын.

Жанболат КЕНЖЕҒҰЛ,

ҚМУ  журналистика мамандығының 2-курс  студенті.

Жанкелдин ауданы.

Суреттерде: Су тазарту станциясының ішкі көрінісі; оператор Мейрамхан Нұрбеков; ауыл тұрғыны Айжамал Баймырза.