Тәртіп сақшысы көз жұмды

5 ақпан күні өзін-өзі өлтіруге әрекеттенген Қостанай ІІБ қызметкері аурухананың жансақтау бөлімінде қайтыс болды. Бүгін сағат 10.10-да дәрігерлер тәртіп сақшысының  қайтыс болғанын анықтады. Басына тиген оқ оның миын зақымдағандықтан өмірін құтқару мүмкін болмаған. 

Бұған дейін Қостанай ІІБ қызметкерінің өзін-өзі өлтіруге әрекеттенуіне оның сүйіктісімен  сөзге келіп қалғаны себеп болуы мүмкін екені хабарланған еді. "Қазіргі уақытта тергеушілер полиция қызметкерінің құрбысымен телефон арқылы сөйлескенінен кейін Қостанай ІІБ- ның  ғимаратынан шығып кеткенін анықтады. Ол қоңырауға жауап бермеді.  Соған байланысты жол-патруль полициясы оны іздеуге шықты. Сағат 10.40-та полицей отырған автокөлік Майлин көшесінен көзге шалынып, патруль жасағы оны арнайы құрал мен қаруды қолданбай-ақ тоқтатты", – деп хабарлаған болатын облыстық ІІД өзіндік қауіпсіздік басқармасының басшысы Жарасхан Ақбердиев.

Полиция бақилық болған тәртіп сақшысының құрбысынан жауап алды.  Ол жігітімен арада қызғанышқа байланысты жанжал шыққанын растады. Оқиғаға қатысты "Өзін-өзі өлтіруге итермелеу" бабымен қылмыстық іс қозғалды. 

Еске сала кетсек , 5 ақпан күні Қостанай ІІБ қызметкері өз машинасында табель қаруымен өзін-өзі басынан атқан еді. Оқиға орнына жедел жәрдем келіп, оны ауруханаға жеткізді. Полицей жансақтау бөліміне жатқызылған болатын.