Жаңа жылдың алғашқы түні Қостанайда 8 сәби дүниеге келді

Соңғы 5 жылда елімізде ана мен бала өлімі 3 есе азайып, туу көрсеткіші 1,5 есе көбейді. Соның арқасында 15 жылда халықтың саны 14-тен 17 млнға жетті.

Ал қалалық перинаталдық орталықтың босану бөліміндегі дәрігерлерінің айтуына қарағанда, шаһарда отбасын құрып, балалы болып, ата-ана бақытына бөленгісі келетіндердің саны жылдан – жылға артуда. Оның жарқын бір дәлелі, жаңа жылдың алғашқы түнінде мұнда 8 сәби дүниеге келді.

Бірі – 3,5 екіншісі – 3,3 келі салмақпен туған сәбилер Қостанайдағы қой жылы дүниеге келген алғашқы ұл мен қыз.
Астрологтар қой  жылы дүние есігін ашқан балалар  өзгелермен тез тіл табыса біледі, сәнді киінуді ұнатады. Сезгіш, өнер тапқыш, қиялға бай болады. Алайда, ерке, қыңыр, құбылмалы болады. Бұл жылы туғандар суретші, актер, бағбан сынды мамандықтарды таңдайды дейді.

Қазақтар қой жылын жақсы жыл санайды. Өткен қой жылдары халыққа жайлы болған, ел молшылыққа кенелген. Қазақстан 1991 – қой жылы тәуелсіз ел атанды. Ахмет Байтұрсынов қой жылы (1873) дүниеге келді.

 

Мешіт Ғазиз