Жас әнші Нүрила
Киелі Батпаққара жері қашанда өнерлілер мен дарындылардан кенде болған емес. Солардың бірі – Нүрила Қоқанбекова. Нүрила Құмкешу орта мектебінің 7-сыныбында оқиды, оқу озаты. Өнер – әр адамның бойындағы белгілі бір құдірет күші секілді. Нүриланың өнердегі аяқ алысы алты жасынан басталды. Содан бастап мектепте өткен іс-шаралардың барлығынан тыс қалып көрген емес. Ән айтса көңілі жадырап сала беретін кішкентай қызымыздың ең алғашқы жеңісі 2013 жылы өткен "Ақжелкен – 2013" жас әншілердің ХІІ-ші аудандық байқауында бақ сынап, бас жүлдені жеңіп алып, аудан әкімінің арнайы сыйлығымен марапатталған кезі еді. Одан кейін де бірнеше байқауларға қатысып, жүлделі орындарға ие болды. Облыс, республика көлемінде топ жарып, абыройымызды асқақтатты.Екі жыл қатарынан облыстық "Алтын микрофон" балалар вокалдық байқауының дипломанты, халықаралық "Алтын микрофон" балалар вокалдық байқауының, "Бозторғай" балалар шығармашылығының халықаралық конкурсының лауреаты.
Баласының бойындағы дарынын байқаған ата-анасы облыстық, республикалық байқауларға өздері жетелеп апарады, оның жолы, киімі, тамағы, бәрін-бәрін өз қалталарынан шығарады, ол үшін ешкімге ренжіген де емес, қайта балаларының жас та болса осындай жетістіктерге жетіп үлгергенін ата-анасы мақтаныш етеді, "оның қуанғаны – біздің қуанғанымыз, сондықтан қызымыздың болашағы үшін қолдан келгенді аямаймыз", – дейді. Нүриланың әкесі Ихсан жеке шаруашылықпен айналысса, анасы Үміткүл Құмкешу ауылының мейірбикесі, ел игілігі үшін қызмет етіп жүрген еңбекқор жандар. Осындай отбасында тәрбиеленіп өскен Нүриланың арманы да болашақта ата-анасының үмітін ақтап, елі үшін еңбек ету. "Теледидардағы әнші аға-апаларымызды көріп, мен де осындай болсам ғой деп армандайтынмын. Сол арманымның орындалып келе жатқанына қуаныштымын. Маған әркез қолдау көрсетіп, жанымнан табылатын ардақты әкем мен аяулы анамның арқасы, сол үшін ол кісілерге айтар алғысым шексіз. Жүректен шыққан ән ғана жүректерге жетеді дейді ғой, мен ән айтқанда өзімді басқа әлемде жүргендей сезініп, өзгеше бір күйге бөленемін. Сондықтан да сахнаға шығып, ән шырқау –мен үшін зор бақыт, болашақта үлкен әнші болсам деген арманым да жоқ емес", – деп өзінің жүрек түкпірінде жатқан сырымен бөлісті жас әншіміз.
Ботакөз ТЕМІРБАЙ.
Аманкелді ауданы.
