ҒАБИТ – “Қостанай қыраны”!
Осының алдында хабарлағанымыздай, Қостанай спорт сарайында қазақ күресінен ҚР Президенті Н.Назарбаевтың жүлдесі үшін "Қостанай қыраны" жарысы өтті. Үш күнге созылған турнирді облыстық спорт және денешынықтыру басқармасы мен "Нұр Отан" партиясының жергілікті филиалы ұйымдастырды. Айта кету керек, ылғи бабы келіскен палуандардың белдесуі қазақ күресінің жанкүйерлерін үлкен әсерге бөледі.
Жарыстың соңғы күні боз кілемге кілең мықтылар шықты. Бірінен-бірі асқан палуандардың арасынан Жанкелдин ауданынан келген Ғабит Балғынбаевтың аты озды. Ол ақтық сында Максим Твердохлебовты айқын басымдықпен ұтып, "Алтын белбеудің" иесі атанды. Сөйтіп, "Қостанай қыраны" атанған торғайлық палуанға 500 мың теңге табыс етілді. Енді Ғабит Балғынбаев 6 шілдеде Астанада өтетін "Қазақстан барысы" турнирінде облыс намысын қорғайтын болады.
Әлібек
ЫБЫРАЙ
Суретте: "Қостанай қыраны" турнирінің жеңімпазы жанкелдиндік Ғабит Балғынбаев.
Суретті түсірген Айбек ЖҮЗБАЙ.
