Жұмасқалиевтің жейдесі 35 мың теңгеге сатылды
"Тобыл" футбол клубы 6-шы қайырымдылық аукционынын өткізді. Олар "Жизнь на ладони" қайырымдылық жобасы арқылы 14 жасар сырқат қыздың еміне ақша жинау үшін, сондай-ақ клубтың 50 жылдық мерейтойына орай жергілікті футболшылардың өткен маусымда киген спорттық жейдесін бәссаудаға қойған болатын. Бас-аяғы 10 футболка сатылып, 107 мың теңге ақша жиналды. 
Ең қымбат Нұрбол Жұмасқалиевтің жейдесі болды. Жанкүйерлердің бірі оны 35 мың теңгеге сатып алды. Осылайша, бұрынғы капитанның футболкасы өткен жылдың рекортын жаңартып отыр. Ол көрсеткіш те Жұмасқалиевтің еншісінде еді. Былтыр капитанның формасы 21000 теңге тұрған болатын. 
Жалпы футболкалар құны 500 теңгеден басталды. Қалған жейделер 5-8 мың теңгеге сатылды. Нәтижесінде, 10 футболкадан 107 мың 300 теңге және 20 АҚШ доллары көлемінде пайда түсті. Түскен қаражаттың барлығы уәде етілгендей "Жизнь на ладони" қайырымдылық жобасына аударылмақ. Нақтылай түссек, эпилепсия ауруына шалдыққан 14 жасар Оксана Масленниковаға Ресейдің Түмен қаласындағы нейрохирургиялық орталықта шұғыл ота жасау керек. 
