Туған жердің бұлағы

Рудный қалалық №5 гимназияның ұстаздары мен оқушылары белгілі қаламгер Ақылбек Шаяхметпен кездесті.

«Тәуелсіз Қазақстанның алтын қоры» жобасы аясында ұйымдастырылған басқосудың басты мақсаты – оқушыларды білім, ғылым, мәдениет және спорт саласындағы елге еңбегі сіңген көрнекті тұлғалардың өмірімен таныстыру арқылы олардың бойында отаншылдық рухын қалыптастыру. «Туған жердің бұлағы» атты тақырыпта өрбіген жүздесуде Ақылбек Қожаұлы өз өмірінен сыр шертіп, шығармашылығындағы жаңалықтармен бөлісті. Сондай-ақ ол Отан, отбасы сияқты қастерлі ұғымдардың мәні мен маңызына тереңірек тоқталып, оқырмандарының сауалдарына жауап берді. Шара барысында бір топ оқушы ақынның қазақ және орыс тілдеріндегі өлеңдерін мәнерлеп оқыса, мектеп кітапханашысы мен ұстаздар қауымы Пайғамбар жасына келген мәртебелі мейманға жүрекжарды лебіздерін білдірді. Осылайша, Қостанай өңірінде Қазақ тілі қоғамына жетекшілік жасап, мемлекеттік тілдің жан-жақты дамуына, ұлттық салт-дәстүрдің өркен жаюы жолында қызмет етіп жүрген Ақылбек Шаяхметпен кездесу мәнді де сәнді өтті.