Шырша кешіне жиналды
Қостанайлық алпыс мүмкіндігі шектеулі бала жаңа жылдық шырша кешіне қатысты. Балақайлар Аяз атадан сыйлық алып, жергілікті цирктің қойылымдарын тамашалады.
«Не берсең де балаға бер, бала үшін жаса» деген бар емес пе?! Бала-болашақ, бала-ата жолын жалғаушы, бала-періште, бала-балғын жүрек. Оларға қуаныш сыйлау үшін қаладағы әлеуметтік қызмет көрсету бойынша жергілікті орталық көңілді кеш ұйымдастырды. Мерекелік шараның өтуіне шаһардағы бір топ кәсіпкер демеушілік жасаған.
Жаңа жылдық іс-шарада мерекелік дастархан жайылды. Аяз ата мен Ақша қар әр қатысушыға сыйлықтар тапсырды. Жаңа жылдық костюм киген балалардың жүздері балбұл жанады.
– Ата-ана үшін баланың қуанғанынан артық не бар?! Біз бала үшін өмір сүреміз ғой. Кішкентайымыз Бағжанды елеп-ескеріп мерекелік шараға шақырғанына қуаныштымыз. Жолдасым Бағдат екеуміз жұмысымызды жиып қойып ұлымызды шырша кешіне алып келдік,-деді жас ана Гүлжан Дастанова.
Мультфильм кейіпкері «Өрмекші адамның» өнері үлкендерді де тәнті етті
Күлкүлі кейіпкерлер кештің ажарын аша түсті
Бағдат пен Гүлжан Дастановтар 8 жасар Бағжанмен бірге қуануда
Ковбой кейпіндегі бала
Бақытты бір сәт
Қыз-жігіттер ән шырқауда
Өнерлі Мәлика Мұхтарова өзі жасаған гүлді кішкентай інісіне көрсетуде
Балалардың қолынан шыққан бұйымдар көрмеге қойылды
Қымбат Досжанова
Суреттерді түсірген Айбек Жүзбай
