Қостанайлық қос оқушы мүгедектерге арналған робот ойлап тапты

Ақылды робот мүгедектер арбасын қозғалтып, мылқаулардың ымдағанын сол сәтінде арнайы мониторға жазып алады. Кешенді кез келген қалта телефонымен басқаруға болады. Бұл құрылғыға жан бітіру үшін Айдос пен Нұржан бір жыл уақытын сарп етті. Әйтсе де, еңбектері еш кетпеді деп хабарлайды «Хабар» телеарнасы.

– "Мүмкіндігі шектеулі жандардың қолын ұзартатын құрылғы ойлап тапсақ" деген ізгі ниеттің нәтижесі – ақылды робот. Кешеннің көмегімен мүгедектер арбасын қалауынша қозғалтуға болады. Кешен мүгедектер арбасын жүргізіп ғана қоймайды, жолында кедергілер кездессе, құрылғы дыбыстап белгі береді. Сол арқылы бөгеттерді айналып өтеді. Мұнда тілі кеміс адамдар үшін де қосымша мүмкіндіктер қарастырылған. Арбаға бекітілген монитор оларға тілдің қызметін атқарады. «Ақылды кешеннің құжаттары таяу арада толығымен рәсімделеді. Сосын әлеуметтік жобалар шеңберінде мұны облыс көлемінде өндіріске енгізуге де болады, -дейді оқушылардың ғылыми жетекшісі Александр Шерцер.

Құрылғыны қолданысқа енгізу көп қаражатты қажет етпейді. Мектеп-интернат оқушыларының жетістігі жалғыз бұл ғана емес. Соңғы жылдардың өзінде облыстық білім бәсекесіне 33 жоба ұсынса, соның 22-сі жүлделі орындарды иеленген.