Жаңаша жазылған туынды
Көркем сөздің көрнекті шебері, Мемлекеттік сыйлықтың лауреаты Сәбит Досановтың Алматыдағы "Арда" баспасынан жақында ғана жарыққа шыққан "Қас-қыр ұлыған түн" атты жаңа романында бүгінгі күннің бейнесі бас кейіпкерлердің аса қиын да күрделі тағдыры арқылы мейлінше сенімді суреттелген. Өмірдің мәні мен өткіншілігі жайлы толымды ой толғаған, айтары анық, бояуы қанық сом бітімді соны туындының оқиға желісі оқырманды бірден баурап алды да, кітапты оқып бітіргенше одан көз алғызбайды.
Романның тұла бойы тұнып тұрған жаңалық. Ақ пен қара ғана емес, құлпыдай құлпырып, жанарыңды суырған алуан түсті бояумен, сан суреткерлік тәсілдермен бірімен бірі шебер жымдасқан лирика мен трагедия да, аңыз бен миф те, өлеңмен өрілген теңіздей терең философия да, қаймағы бұзылмаған қарасөзбен тебірене төгілген сымбаты бөлек сұлу сыр да бар мұнда.
Баспадан шыға салып оқырман қауымның ыстық ықыласы мен әдебиет білгірлерінің биік бағасын иеленіп үлгірген "Қасқыр ұлыған түн" – сұңғыла суреткер Сәбит Досановтың ғана емес, бүгінде әлемдік биікке көтерілген қазақ прозасының да аса ірі көркемдік табысы.
Өзгелерге ұқсамайтын өзгеше романды оқуға асыңыз, қадірлі оқырман. Өкінбейсіз.
Роман жайлы пікірлеріңізді "Арда" баспасына жолдауларыңызды өтінеміз. Мекенжайы: Алматы, Қабанбай батыр, 47.
