Мүгедектер қоғамының мерейтойы

Рудный қалалық мүгедектердің ерікті қоғамы өзінің мерейтойлық датасын «Айгүл» кинотеатрында атап өтті. Оған өнер десе, ішкен асын жерге қоятын бірлестің белді мүшелері қатысып, көрерменнің көзайымына айналды.

Кеште қала әкімінің орынбасары Мақсұт Досболов қоғамның жұмысына жоғары баға беріп, көпфункциялы құрылғыны сыйға тартты. Жұмыспен қамту және әлеуметтік бағдарламалар бөлімінің басшысы Светлана Костина бірлестік жетекшісі Санаш Есжановқа алғыс хатты табыстаса, «ССКӨБ» АҚ әлеуметтік мәселелер бойынша бюро бастығы Елена Скаредина бірлестіктің 60 жылдығына арналған естелік кітапты сыйға тартты. Рудныйлық достарын құттықтауға Қостанай мен Қарабалықтың мүгедектер қоғамы да арнайы келгенін айта кеткен жөн.

-Ұзақ жылдар бойы бізге қала әкімдігі, білім мекемелері мен кәсіпкерлер жан-жақты қолдау көрсетіп келді. Қарамағымызда коляскалық мүгедектерге арналған күндізгі стационар мен әлеуметтік такси жұмыс істейді. Биыл 600-дей мүшесі бар бірлестігіміз заңды тіркеуден өткіздік. Енді түрлі тендерлер мен мемлекеттік сатып алулар конкурсына қатысып, өз жұмысымызды одан әрі жандандыруға мүмкіндігіміз бар, – дейді Санаш Сағындықұлы.

Салтанатты концерттің соңында барлық қатысушыларға тәтті сыйлықтарға ие болды

 

Қуаныш Сейдоллаұлы