Тобыл өңірі Тұңғыш Президент күнін атап өтті
Бүгін Қостанайда Сити орталығында Қазақстан 
Республикасының Тұңғыш Президенті күніне орай мерекелік концерт өтті. Тобыл өңірінің көркемөнерпаздары осынау игі шараға белсене қатысып, күннің аязына қарамай тайлы-тұяғымен жиналған дүйім жұртқа өнерлерін паш етті.
Жалпы, бұл мереке Тобыл топырағында 28 қараша күні бастау алған-ды. Міне, соның қорытындысы ретінде көрсетіліп отырған мәдени-мерекелік шара өз деңгейінде ұйымдастырылды.
Әзірбайжан, корей, қазақ, қырғыз мәдени орталықтарының өнер шеберлері ән айтып, би-билеп, күй тартып думанды одан сайын қыздыра түсті. Ақындар Елбасы Нұрсұлтан Назарбаевқа арнаған жырдан шашу шашса, игі шараны жүргізушілер викториналық сұрақтар қойып, дұрыс жауабын тапқан көрермендерді сыйлықпен марапаттады. Театр әртістері нәшіне келтіріп жыр оқып, қойылымнан үзінділер қойды.
Нұрболат Мешітбаев
Суреттерді түсірген Айбек Жүзбай
