Тіл жанашырлары бас қосты

Ы.Алтынсарин атындағы Рудный әлеуметтік-гуманитарлық колледжінде қазақ тіліне жанашыр жастардың қатысуымен «Мемлекеттік тіл – менің тілім» атты акция өтті. Оның ашылу салтанатына Қостанай облысы әкімдігінің Тілдерді дамыту басқармасы бастығының орынбасары Қазымбек Ахметов қатысып, мемлекеттік тілді жетік меңгеріп қана қоймай, орыс және ағылшын тілдерін білу – табысты болашақ кепілі екенін жеткізді. Акцияны әрі қарай «Тілдарын» клубының белсенді мүшелері жалғастырып, өз ойларын ортаға салды.

Мәселен, ҚМУ-дың 4-курс студенті қазақтың үлес салмағы аз Федоров ауданында туып-өскеніне қарамастан қазақша мектепке барғанын тілге тиек етсе, Қостанайлық №18 орта мектептің қазақ тілі пәнінің мұғалімі Виктория Семененкова шәкірттеріне дұрыс сөйлеп қана қоймай, ойын айқын жеткізе білуге тәрбиелеп жатқандығын сөз етті. Мінберге шығып, қазақ тілінде сайраған өзге ұлт өкілдерінің қай-қайсысын алсаң да тілге деген құрметі ерекше. Шараның түп мақсаты да сол – қазіргі жастардың мемлекеттік тілге деген оң көзқарасын қалыптастыру.

Акция барысында түрлі викториналық ойындар ұйымдастырылып, белсене қатысқан бірнеше ұл-қызға сый-сыяпат жасалынды.

 

Қуаныш Есқабыл