Таңдау көп, сапа жоғары

Қостанайда аймақтық ауыл шаруашылығы көрмесі өтіп жатыр. Жетінші жыл қатарынан ұйымдастырылып отырған көрмеге агроөндіріс саласындағы соңғы техникалар мен құрал-жабдықтар қойылған.

Көрмеге Нұр-Сұлтан, Қарағанды, Көкшетау, Павлодар, Петропавл қалаларындағы компаниялармен қатар көршілес елдердің өкілдері келді. Олардың арасында ауыл шаруашылығы техникаларын шығаратын «Ростсельмаш» кәсіпорнының мамандары да бар. Аталған компания өкілдері көрмеге әкелген жаңа техникаларын таныстырды. – Біз Қостанайда өтетін көрмеге бірінші рет қатысып отырған жоқпыз. Биыл RSM 2375 тракторын әкелдік. Көкшетауда құрастырылған. Бұл техникада мың аттың күші бар. Бәгіне 927 литр жанармай сыйып кетеді, – дейді компанияның менеждері Асқар Молдағалиев.

Көрменің салтанатты ашылуында сөз сөйлеген облыстық Ауыл шаруашылығы басқармасы басшысының орынбасары Төлеутай Ержанов көрменің өңірдегі тауар өндірушілер үшін маңызды шара екенін атап өтті.

– Бүгін ондаған кәсіпорын ауыл шаруашылығы саласындағы жаңалықтарымен бөлісіп отыр. Бұл – егінмен, мал шаруашылығымен айналысатын қостанайлықтар үшін орасан мүмкіндік, – деді Т.Ержанов.

 

Аслан Қанғожин

Суреттерді түсірген Бердіболат Көркембаев