Профессордың тәлімі

Рудныйдың ағылшын тілі оқытушылары Вирджиния штаты (АҚШ) колледжінің профессоры Филипп Аймелмен кездесті.

Басқосу халықаралық ынтымақтастық шеңберінде Рудный индустриялық институтында өтті және оған қаланың 21 мектебінің оқытушылары түгелдей қатысты. Шара барысында шетелдік қонақ АҚШ-тың білім беру жүйесіндегі ерекшеліктерін айтып, мәдениет пен дәстүрден сыр шертті. Емен жарқын әңгімеге ұласқан кездесуде оқытушылар ағылшын тілін оқытудағы өз әдістемелерімен бөлісіп, тілдік тәжірибені арттыруға мүмкіндік берген институт басшылығына ризашылықтарын білдірді.

Айта кетерлігі, «Шақырылған профессор» бағдарламасы аясында Рудный индустриялық институтына келген қонақ бүгінде студенттерге «Бизнесті ұйымдастыру», «Коммерциялық қызметтің іскерлік этикасы мен мәдениеті», «Қаржылық есеп сараптамасы», «Кәсіпкерлік», «Кәсіби ағылшын тілі» сияқты пәндер бойынша дәріс оқуда.

 

 

 

Қуаныш Есқабыл