Заманауи жабдықпен толықты

Рудный қалалық перзентхана үйі заманауи медициналық техникамен толығып, перинатальды орталық мәртебесіне ие болды. Жаңа жабдықтарды Қостанай облысы әкімдігі мен ERG тобы арасындағы меморандум шеңберінде «ССКӨБ» АҚ 50 миллион теңгеге сатып алған.

Бүгінде бұл орталықта медициналық қызмет көрсету аясы айтарлықтай кеңейген. Мәселен, шала және аз салмақты сәбилерге арнайы бөлімше ашылып, штат кардиолог, рентгенолог, нервопатолог, көз дәрігері сияқты мамандармен толықты. Жаңа орталықта түрлі патологиялық ауытқушылықтарды дер кезінде анықтауға да мүмкіндік бар.

Бірлестік Президенті Мұхамеджан Турдахуновтың айтуынша, қазақстандықтардың денсаулығына қамқорлық жасау, Мемлекет басшысы Нұрсұлтан Әбішұлы Назарбаевтың Жолдауда белгіленген маңызды міндеттерінің бірі.

– Сондықтан біз де әлеуметтік жаңғырту мәселелеріне келгенде батыл қадамдар жасап келеміз. Алдағы уақытта да кеншілер қаласы тұрғындарының тұрмыс-тіршілігін жақсартуға бар күшімізді аямаспыз, дейді ол.

 

Қуаныш Есқабыл