Алдағыны ойын көрсетеді

Жергілікті "Тобыл" футбол командасының биылғы тұсаукесеріне шамамен жүзден аса жанкүйер жиналды. Кездесу кеші өткен "Қостанай плаза" сауда-ойын-сауық орталығының бір бөлігінде ине шаншар орын болмады десек болады. Жанкүйер көңілі алдағы маусымға алаңдаулы.

Жиырма жылдан астам жанкүйер болып жүрген  Сырбай Қонақбайұлы команда қатарына алынған жастарға сенетінін айтады.

-Командадан негізгі ойыншылардың біразы кеткенін білеміз. Сол себепті олардың орындары алмасып, құрамда біршама өзгеріс бар екені байқадық. Бір жағынан жастардың негізгі құрамнан табылуы, мектебімізді қалыптастыруға сеп болады деген үлкен үміт сыйлап отыр. Қалған жаңадан келген ойыншылардың аяқ алысын маусым барысында біле жатармыз. Облыс басшылығы бұл спорт түріне оң көзбен қарап, демеушілер табылып жатса, нұр үстіне нұр болар еді, – дейді ол.

Нұрым Қойшыман есімді жанкүйер Қостанайға оқуға келгелі екі-үш жылдың айналасында команданың ойынын қызықтап келеді.

 -Өзім осы клубқа жанкүйерлік еткелі команданың талай жетістігіне куә болдым. Ел чемпионы атанды, екі рет суперкубокты иеленді. Қысқасы, жүлдеден қол үзген жоқ. Әлі де сенімім мол. Оны келер аптада болатын ойын барысынан нақты айта аламын. Жалпы, бүгінгі шоу мерекелік көңіл-күй сыйлап жатыр, – дейді Нұрым.

Рауан Оспановты  жергілікті футболдан гөрі шетелдің классикасы қызықтыратын. "Аякс", "Реал", "Барселонаның" ойындарын жіберген емес.

-"Тобылдың" екі жыл бұрын чемпиондыққа таласып жүргенін естіп, ойындарына бара бастадым. Сол жылы соңғы болған алты ойынын жібермей қарадым. Теледидардан чемпион болғанын көріп төбем көкке жеткенін білемін. Сол көрініс ешқашан көкейімнен кетпейді, – дейді ол.

Кездесуге келген команданың ең кішкентай жанкүйеріне футболшылардың қол таңбалары бар жейде сыйға берілді. Төрт жасар Әли жиналған жұртты одан сайын таңқалдырып, ойынға деген қызығушылығын байқатып қалды. Команда тарихына қатысты викториналық сұрақтарға жауап беруде, футболда кездесетін жаттығу сайыстарында жиналған жұрт өздерінің талпыныстары мен белсенділігін танытты. Аса шеберлікпен көзге түсіп, сауалдарға дұрыс жауап берген қатысушыларға команданың атрибуттары үлестірілді. Таныстырылған команда құрамымен суретке түскен жанкүйер қауымның қуанышында шек жоқ.