Жер кезегінде тұрған адамдар саны отыз мыңнан асты
Былтыр Қостанай қаласында төрт мың адам жер телімін алуға ниет білдірген. Соның ішінде 1,9 мың өтініш "Е-өтініш" электронды жүйесі арқылы түсті. Бұл туралы қалалық әкімдікте өткен аппарат кеңесінде айтылды.
Қалалық жер қатынастары бөлімінің басшысы Марат Темірбаевтың айтуынша, төрт мың өтініштің 2,1 мыңы жер комиссиясының апта сайынғы отырысында қаралды. Нәтижесінде 528 жер учаскесі мақсатты пайдалануға берілді. Оның ішінде 278-і тұрғын үй алқабы мен бау-бақша үшін, қалған 250 жер телімі коммерциялық-әлеуметтік аймаққа берілген. Мекеме жер учаскелерінің мақсатты пайдаланылуына және мемлекет меншігіндегі жерлерді заңсыз алу әрекеттеріне мониторинг жүргізеді. Мұндай жұмыстар жергілікті полиция қызметімен бірлесе атқарылады. Мәселен, өткен жылы жерді заңсыз алу және мақсатсыз пайдаланудың 79 фактісі анықталған.
– Заңсыз пайдаланылған жер телімдері туралы мәліметтер облыстық жер ресурстары басқармасына жолданды. Әрі қарай тексеру шаралары жүргізіледі. 2020-2022 жылдар аралығында шағын және орта кәсіпкерлікті тексеруге қатысты мораторий жарияланған болатын. Соның салдарынан аталған мерзімде жер заңнамасының талаптарын тексеруге мүмкіндік болмады. Мораторий 2022 жылдың 11-тамызынан бастап жойылды. Қазіргі күні жер заңнамасын бұзушыларды анықтау және алдын алу жұмыстары күшейді, – деді қалалық жер қатынастары бөлімінің басшысы Марат Темірбаев.
Үй салуға жер телімін алғысы келетін азаматтардың саны 33 120 адамға жеткен. Жер телімдерін беру мерзімінің ұзақтығы мен кезектің баяу жылжитынын айтып, шағымданатындар да баршылық. Азаматтардың сұранысын қанағаттандыру үшін екі мың гектар жер қажет екен. Алайда, Қостанай қаласының аумағында мұндай көлемдегі бос жатқан жер жоқ. Кезекті азайту үшін "Қонай" шағын ауданында жеке тұрғын үй салуға 1967 жер телімін беру жоспарлануда. Бірақ, ол жерде "Отбасы банкінің" несиелеу механизмі арқылы салынған дайын үйлер беріледі.
Қымбат ДОСЖАНОВА
