Қостанайда еркін күрестен республикалық турнир өтіп жатыр
Қостанайда еркін күрестің негізін қалаушылардың бірі Петр Матущакты еске алуға арналған ХІХ республикалық турнир басталды. Жарысқа 2006-2008 жылы туған жасөспірімдер қатысып жатыр. Турнирде еліміздің 17 өңірінен келген 300-ден аса спортшы күш сынайды.
Турнирдің бас төрешісі Орынбек Балаған спортшылардың алғашқы легі жақсы күрескенін айтады. Бұл жарысқа ол Солтүстік Қазақстан облысынан келген.
Турнирдің бас төрешісі Орынбек Балаған спортшылардың алғашқы легі жақсы күрескенін айтады. Бұл жарысқа ол Солтүстік Қазақстан облысынан келген.
– Жасөспірімдердің шама-шарқын байқадым, жақсы баға беруге болады. Сәуір айында үлкен жарыс өтеді, бұны сол чемпионатқа іріктеу десек те болады. Әр өңірден келген спортшы саны да көп. Демек даму бар деген сөз. Қазір іріктеу сайысы жүріп жатыр, финал ертең өтеді, – дейді халықаралық дәрежедегі төреші О.Балаған.Жарысқа Қостанай облысынан 9 аудан спортшы алып келген. Еркін күрестен аға бапкер Кәрісбек Махамбетовтің айтуынша, өзге аудандарда да күрес үйірмелерін ашу жұмыстары жүргізіліп жатыр.
– П.Ф. Матущакты еске алуға арналған турниді өткізу дәстүрге айналды. Биыл 19-шы рет ұйымдастырылып отыр. Бір айдан кейін ҚР чемпионаты басталады, бұл турнир сол жарысқа іріктеу. Қостанай облысының балуандары жүлдесіз қалған емес, осы жолы да үмітіміз мол. Өңірден болашақ чемпиондар шығады деп сенемін. Алматыда өткен ҚР ересектер арасындағы 6-шы жазғы спартакиадаға қатысып келдік. Еркін күрестен бір қызымыз күміс, біреуі қола алды, 2 ұлымыз қола медаль иеленді, – дейді халықаралық дәрежедегі спорт шебері Кәрісбек Махамбетов.Рудный қаласындағы спорт мектебінде 160 спортшы жаттығады. Бүгінгі күреске салмақ дәрежесі бойынша іріктеуден өткен 8 балуан қатысып отыр.
– Шәкірттерімнің аяқ алысы жаман емес. Қазір ғана бір шәкіртім қарсыласын жеңді. Финалға өту үшін әлі 3 балуанмен кездесуі керек. Сенемін. Ұтып келе жатыр, – дейді жаттықтырушы Жанғали Нұрмаханбет.
Шәкірті Еркін 55 салмақ дәрежесінде күреседі. Ол еркін күреспен 12 жасынан айналыса бастаған.– Рудныйдағы А.Байтұрсынұлы атындағы мектепте 9-сынып оқимын. Еркін күреске әкем баулыды, өйткені ол да күреспен айналысқан. Өткен жылы дәл осы турнирде қарсыласыма есе жіберіп алдым. Бүгін ұттым. Финалға шығып, жүлдегер атанамын деген сенім мол, – дейді жас балуан Еркін Хайбуллаев.
Турнирге жалпы 213 ұл, 94 қыз қатысуда. Олар 10 салмақ дәрежесі бойынша күреседі. Жарыс жеңімпаздары ертең, яғни, 11 ақпанда анықталады.
Сералы МЫРЗАБАЙ.
Суреттерді түсірген Бердіболат КӨРКЕМБАЕВ.
