Қостанайда дәстүрге айналған “Армандастар” фестиваль-байқауы өтіп жатыр
Қостанайда "Армандастар" деп аталатын облыстық балалар шығармашылығы фестиваль-байқауы өтіп жатыр. Бірнеше жылдан бері дәстүрге айналған бұл іс-шара биыл Құрманғазы Сағырбайұлының 200 жылдығына арналып отыр.
Фестивальге барлығы 16 театр және 21 хореографиялық ұжым жиналған. Олар – аудандық, қалалық деңгейдегі сайыстарда жүлдегер атанған үздіктер. Қатысушылар жеребе бойынша кезек алып, рет-ретімен өнер көрсетуде. Бишілер қаламыздағы "Мирас" мәдениет үйінің сахнасында сайысқа түссе, театр ұжымдары М.Горький атындағы гимназияның акт-залында өз қойылымдарын көрерменнің назарына ұсынуда.
Театр ұжымдарының қойылымдарына тақырыптық шектеу қойылмаған. Ал бишілер екі бағыт бойынша "Халық биі" және "Замани стильдегі би" аталымдарында сынға түсуде. Сайыс басталар шақта балалармен сөйлесіп, сахна сыртындағы қызықты сәттерге куә болдық. Бірі толқып тұрса, енді бірі алаңсыз күйде кезегін күтіп тұрды. Ал жетекшілері қобалжып, өнерлі жастардың дайындығын қайта-қайта тексерумен әлек. Аманкелді ауданындағы жалпы білім беретін мектебінің "Гүлдерай" бишілер тобы ерекше киім үлгісімен көзге түсті. Тобыл қаласындағы Н.Наушабаев атындағы мектеп-гимназиясының театры Ахмет Байтұрсынұлының өмірі мен шығармашылығына арналған қойылымды сахналады. Аталмыш мектепте екі жыл бұрын "Қара шаңырақ" деп аталатын театр құрылған екен. Үйірмеде отызға жуық оқушы бар.
Таңертең басталған байқау әлі жалғасуда. Кешке қарай қорытындысы шықпақ.
– Мәдениет және өнер саласының майталман мамандарынан жасақталған әділқазылар алқасы құрылды. Қойылған талаптың үдесінен шыққан үздіктер облыстық білім басқармасының грамоталары және ақшалай сыйлықтарымен марапатталады. Бас жүлде иегерлері республикалық кезеңге жолдама алады. Олар болашақта облысымыздың намысын қорғайды. Бұған дейінгі жылдары Қостанай облысының балалары республика деңгейінде жақсы өнер көрсетіп, бірнеше мәрте жүлдегер атанды. Мысалға, былтыр Жанкелдин ауданындағы өнер мектебінің театр ұжымы республика бойынша бас жүлде, хореография ұжымы үшінші орын алды. Жылдан жылға балалардың қызығушылығы артып, қатысушылардың саны көбеюде. Биылғы байқауға өңірдегі мамандандырылған ұйымдардың өнерпаздары алғаш рет қатысуда – деді психологиялық қолдау және қосымша білім беру өңірлік орталығы директорының оқу және тәрбие жұмыстары жөніндегі орынбасары Жанна Исмурзинова.
Қымбат ДОСЖАНОВА.
Суреттерді түсірген Б. АХМЕТБЕКОВ.
