ҚҰРДЫМҒА КЕТКЕН “ҚАЗАҚ ТҰЛПАРЫ” ҚАЙТСЕ ЕҢСЕ ТІКТЕЙДІ?
Кезінде дүркіреп тұрған "Қазақ тұлпары" зауытына жабылып қалу қаупі төніп тұр. Облыстық ауылшаруашылық басқармасының басшысы Тимур Бейсембаев осылай деп дабыл қақты. Бұдан он шақты жыл бұрын кәсіпорынның қарамағында үш жүздей асылтұқымды жылқы бар еді. Асылтұқымды болғанда, жылдар бойы ғалымдардың көз майын тауысып, шығарған кәдімгі Қазақтың қазанатының тұқымы-тұғын. Атағы алысқа кеткен жылқы зауыты құзырлы министрліктердің "Сен салар да, мен салар, атқа жемді кім салар" деген сияқты қақпақылына ұзақ жыл шыдап келгенмен, ақыры дағдарысқа ұшырады.
Бұл мәселе туралы біздің басылым бұдан бұрын бірнеше рет мәселе көтерген. Алайда, жағдай оңалған жоқ. Зауыттың бүйтіп құлдырауын әркім түрлі өзінше жориды. Кәсіпорыннан білікті мамандар кетіп қалды. Министрлік тарапынан қаржыландыру тоқтатылды. Осындай саналуан пікір бүгінде ел ішінде желдей еседі.
-2019 жылы "Қазақ тұлпары" ЖШС-інде 80 жылқы ғана қалды. Соның тек, 40 -ы ғана Қостанай тұқымы. Ал биыл жағдай тіпті сүреңсіз. Кәсіпорында небәрі 64 Қамбар ата түлігі қалды. Жылқы зауыты қарызға белшеден батқан. Күні бүгін серіктестіктің жалпы берешегі 241 млн теңгеден асады. Осыдан екі жыл бұрын "Қазақ тұлпары" "Қарабалық ауылшаруашылық тәжірибе стансасының қарамағына өткен-ді. Өткен жылы желтоқсан айында сенімгерлік басқару мерзімі аяқталды. Одан әрі шарт ұзартылған жоқ. Ендігі міндет, қайткенде Қостанай жылқысын сақтап қалуымыз керек. Ол үшін кәсіпорынды сауықтыруға ауылшаруашылығы министрлігінен қаржы бөлуін сұрап, зауытта сауатты менеджмент қалыптастыруымыз қажет,-деді басқарма басшысы Тимур Бейсембаев.
Облыс әкімінің қатысуымен өткен алқалы басқосуда орынды көтерілген мәселені "Қазақ тұлпары" ЖШС директоры Айгүл Амандықова іліп әкетті. Ол кәсіпорынды субсидиялау қажеттігін алға тартты. Сонда ғана берешектен құтылуға болады.
-Біз жылқы зауытын қаржыландыру бағдарламасын қайтаруды сұраймыз. Қостанай тұқымы – облыстың маңдайына біткен жалғыз бренд еді. Қостанай тұқымы бәріміздің мақтанышымыз -тұғын. Бұл жылы жауып қоя салатын мәселе емес. Біз жылқы популяциясын сақтап, дамытуымыз керек. "Қазақ тұлпары" мемлекеттің қарамағындағы кәсіпорын. Бұған дейін біз бернеше рет ұсыныс жасадық. "Атамекен" ҰКП -да, ауыл шаруашылығы басқармасына да жүгіндік. Бірақ, онымыздан түк өнген жоқ, – деді жылқы зауытының директоры.
Жиын барысында Айгүл Амандықова жылқы зауытына облыстық ауылшаруашылық басқармасы арқылы қаражат бөлу мүмкіндігі туралы сұрады. Мәселенің түп-төркініне терең үңілген облыс әкімі Құмар Ақсақалов кәсіпорынды толық қолдауға дайын екендігін айтты.
– Өкінішке қарай, "Қазақ тұлпарының" жағдайы күрделі. Бұған жол берсек, еліміздегі бірегей жылқы зауытын жоғалтып алуымыз әбден мүмкін. Сондықтан, біз бұл мәселені бақылауға аламыз. Қостанай тұқымын одан әрі дамыту үшін, асылдандыру жұмыстарын облыстық бюджеттен дербес қаржыландыруға дайынбыз, – деді өңір басшысы.
Ол жақында "Қазақ тұлпары" кәсіпорынына барып, жағдайды өз көзімен көрмек. Содан соң жылқы зауытының мәселесін жан-жақты талқылауға пейілді екендігін жеткізді. Облыс әкімінің бұл сөзінен кейін құрдымға кеткен "Қазақ тұлпары" қайта еңсе тіктейді деген көптің көкейіне сенім ұялады.
Әлібек ЫБЫРАЙ.
Суреттерді түсірген Бердіболат КӨРКЕМБАЕВ.
