Таулар алыстаған сайын биіктей түседі
Жыл артынан жыл, ай артынан ай өте жақсы адамның аты да, істеген ісі де ел жадында ұм-тылмай сақталып, уақыт деген керуен көші алға қарай жылжыған сайын оның даралығы, тұлғалығы, ерекшелігі, биік таудай биіктей береді екен. Ізгілік пен қарапайымдылық, ірілік пен парасаттылық сияқты адами қа-сиеттерді бойына сіңіріп, өнегелі өмірімен, елеулі еңбегімен, абзал азамат, ардақты аға, қоғам қайраткері, Қазақ ССР-і Жоғары Кеңесінің депутаты болған, Ұлы Ұстаз Ыбырай Алтынсариннің ізбасары деп Масғұт Шалабаевты айтуымызға болады. Ол кісіні көргеніміз жоқ, бірақ, артына қалдырған соны бір игі істерін әріп-тестері мен көзі көргендерден естіп, өткен шақта "пайым-парасаты мол, жақсы кісі болған еді" деп айтарымыз сөзсіз. Міне, елінің осындай азаматына арналған "Ұстаз қызметіндегі шабыт пен рухани байлық" тақырыптағы педагогикалық оқылым Қостанай педколледжінде болып өтті.
– Мен бұл кісінің шәкіртімін. Ағамыз мұғалім деген атты ардақтап, мәртебесін биіктетіп, жан-жағына шұғылалы сәуле шашқан десем де болады. Өзі ақын, шахматшы, жан-жақты білімді, өз заманының жаңашыл педагогы, ұйымдастырушы. Ол кісіге қандай теңеу айтсаңыз да жарасымды. Шахмат ойнауды да сол кісіге қарап үйрендім. Қай жерде сөй-лемесін, сол сөздерінің барлығы да орнықты, дәлелді. Қалай тамсанбайсың, тәлім-тәрбие алып үйренбейсің, – деді бізге ҚР білім үздігі, ардагер ұстаз Қ.Сақауов.
Педагогикалық оқылымда саясаткер, ҚР Парламент Мәжі-лісінің IV шақырылымының депутаты В.Вишниченко, Қазақ ССР оқу-ағарту ісінің үздігі С.Мачнева, Докучаев орта мектебінің директоры С.Мырзатаев, Сарыкөл ау-дандық орталықтандырылған кі-тапхана жүйесінің директоры С.Дүтбаев, қызы Г.Әлиева және тағы басқалар М.Шалабаев туралы естеліктерін, еліміздің болашағы үшін еткен еңбегі жайлы, қандай ұстаз болғандығы жөнін-де жылы-жылы әңгімелер айтты. Шешендер қай аудан мектебінің басшылығында болмасын, сол мектептің мәртебесі мен педагогтар ұжымының шығармашылығын, кәсіби біліктілігін биіктетіп, оқушылардың білімдерін, даралықтарын ұшқырлықпен ұштай білді, білім беру мен тәр-бие жұмысын жаңа бағытта ұйымдастыру нәтижесінде жоғары деңгейлерге көтерді, салауатты өмір салтын насихаттап, ұстаздар мен оқушыларды спортқа деген қызығушылығын арттырып, өлең жазып, елін-жерін сүйе білуге ұмтылдырды деді. Бүгінде М.Шалабаевтың білім саласындағы еңбегі, қалдырған ізі қашанда ұрпақ сабақтастығының жалғасы ретінде қалатындығын, балаларына жақсы әке, жұбайына адал жар болғандығын жеткізді.
Тағылымы мол педагогикалық оқылымда колледж студенттері педагог М.Шалабаевтың өлеңдерін оқыды.Оқылымда ұстаздың жұбайы Райхан Қайдарқызы, балалары, туған-туыстары және мектеп директоры болып қызмет атқарған аудандардан да қонақтар да әңгіме-естелік айтты.
Гүлназым
САҒИТОВА
