Ауылға ауыз су жетті
Бүгін Қостанай ауданының Садчиков ауылында орталықтандырылған ауыз су жүйесі іске қосылды. Осы сәтті жиырма жылдай уақыт күткен жергілікті тұрғындардың қуанышында шек жоқ.
Садчиков – ажарлы, әлеуетті ауыл. Үш мың тұрғыны бар. Мұнда ауыз судан басқа мәселе жоқ. Бұл түйткіл 90-шы жылдардан бері жергілікті халықтың бас ауруына айналып келеді. Тіршілік нәрін бұлақтан тасып, құдықтан тартып тұтынып отырды. Олар судың сапасына үнемі шағым айтатын. «Қашан тұнық, тұщы су ішеміз?» деген сұрақтар жергілікті басшылыққа жиі қойылатын. Міне, ауылдықтардың арманы бүгін орындалып отыр. 
«Бұл – біз үшін үлкен мереке. Ауылда атқарылған ең үлкен іс. Ауыз су оңай жолмен келген жоқ. Өзім 21 жыл әкім болып жұмыс істеп, екі жыл бұрын зейнетке шықтым. Сол уақыт ішінде шешімін таппай келген мәселе еді. Есеп беру баяндамаларымды тұрғындар осы сұрақпен тоқтататын. Игі істің жүзеге асуына аудан әкімі Жансұлтан Тәукеновтің зор ықпалы бар. Ол Садчиковқа судың міндетті түрде керек екенін жоғарғы жаққа дәлелдеп берді. », – дейді ауылдың бұрынғы әкімі Сақтаған Байманов.
Ауылды ауыз сумен қамту жобасына 2021 жылы республикалық бюджеттен 1,104 млрд теңге қаржы бөлінген. Құрылыс жұмыстары сол жылы басталып, биыл аяқталды. Мердігер – «Life Story Invest» ЖШС. Магистральді және таратушы тораптың жалпы ұзындығы – 12 882 метр. Ең бастысы, сүзгіден өткен судың сапасы жоғары. Нысанның ашылу рәсіміне қатысқан аудан басшысы және жергілікті тұрғындар дәмін татып көріп, жақсы бағаларын берді.
Ауыл әкімдігі өкілдерінің айтуынша, су желісін үйіне тарттыру үшін тұрғындардың бірі қалмай өтінім берген. Қазірдің өзінде халықтың барлығы дерлік аулаға келіп тұрған сапалы суды үйлеріне кіргізіп алған. Қуаныштары қойнына сыймай отырған отбасылардың бірі – зейнеткер Возияновтар.
«Зор шаттыққа кенеліп отырмыз. Бұл керемет оқиғаны көп күттік. Ақыры тілегенімізге қолымыз жетті. Әрине, үй алдында құдығымыз бар еді. Бірақ ондағы су нашар, кермек татиды. Үйде шалымыз екеуіміз ғана тұратындықтан, басқа жақтан тасып ішуге денсаулығымыз да келмейді. Басты мәселеміздің шешілгеніне өте қуаныштымыз. Мына су бұрынғымен салыстырғанда бал татиды. Билік өкілдеріне алғысымызды айтамыз», – дейді қарт тұрғын Людмила Возиянова.
Суреттерді түсірген Бағдат Ахметбеков
