Келісіп пішкен тон келте болмас

Бүгін облыс орталығында "Халық қатысатын бюджет" жобасына ұсыныстарды қабылдау басталды. Кәмелет жасына толған кез келген азамат қаланы абаттандыруға, тұрғын үй-коммуналдық шаруашылық саласына қатысты өздерінің жобаларын әзірлеп, оны Қостанай қаласы әкімінің ресми интернет-ресурсына жолдай алады. 

Жинақталған жобалар бірінші наурызға дейін қабылданып, көпшіліктің талқысына ұсынылады. Одан кейін, дауыс беру кезеңінде, қолдауға ие болған жобалар жергілікті бюджет есебінен қаржыландырылып, іске асыруға бағытталады. Ұсыныстарды жіберу үшін арнайы үлгідегі өтінішті толтыру керек. Жобаның талап-тәртібі әкімдіктің ресми сайтында орналасқан. Дауыс беру биылғы жылдың 5-24 сәуір аралығында өтеді және оған кәмелет жасына толған кез келген қала тұрғыны қатысуға құқылы.

"Халық қатысатын бюджет" жобасы 2020 жылдан бастап республикалық, облыстық маңызы бар қалаларда және астанада іске асырылып келеді. Оның мақсаты – жергілікті бюджет қаражатын бөлу кезінде халықтың ауқымды қатысуын қамтамасыз ету. Іске асырылып жатқан «жобалар» және оларды қаржыландыруға арналған қаражаттың пайдаланылуы туралы ақпарат интернет-ресурстарда жария етіледі. Жалпақ тілмен айтқанда, "Халық қатысатын бюджет" жобасының мазмұны "Келісіп пішкен тон келте болмас" деген даналық сөзбен астасып жатыр. Халық көкейде жүрген жобасын ұсынады, билік көпшіліктің пікірін ескеріп, әдемі ұсынысты әрі қарай демеп жібереді. Ымыраласып, келісе отыра бастаған әрбір істе қайыр бар екені әуел бастан белгілі.

Мемлекет басшысы Қасым-Жомарт Тоқаев 2021 жылғы 1 қыркүйектегі Қазақстан халқына Жолдауында «халық қатысатын бюджет» табысты енгізілгенін атап өтті. Жолдау мәтінінде «Жергілікті өзін-өзі басқаруды дамыту – басым бағыттың бірі. «Халық қатысатын бюджет» орталыққа бағынатын қалалар мен облыс орталықтарына табысты енгізілді. Азаматтардың нақты сұранысына сәйкес ондаған абаттандыру жобасы жүзеге асырылды. Бұл – жақсы тәжірибе. Енді абаттандыру және тұрғын-үй коммуналдық шаруашылығының бюджетіндегі «халық қатысатын» үлесті 10 есе арттыру керек» делінген.

Қостанай қаласында 2020 жылы 2021 жылы жүзеге асыруға арналған 18 жобалық ұсыныс түскен. Оның он бірі іріктеу талаптарына сай келмегендіктен қабылданбай қалды. Қалған жетеуі қоғам талқысына ұсынылып, көп дауыс жинаған бес жоба іске асырылды. Аталған жобаларды жүзеге асыру үшін 31 миллион 976 мың теңге бөлінген. Жобаның 2021 жылғы қорытындысына тоқталсақ, тұрғындар ұсынған тоғыз жобаның бесеуі былтыр жүзеге асырылды. Ол үшін 35 миллион 342 мыңге теңге жұмсалған. Бес жобаның бәрі де ауланы абаттандыруға арналыпты. Олар: 8-ші шағын аудандағы "Буревестник" спорт алаңы, Абай көшесі 26-үйдің ауласындағы "Островок веселого детства" ойын алаңы, Ворошилов, 3/1 мекенжайындағы "Улыбка" балалар алаңы, Дзержинский көшесі 56 үйдің ауласындағы "Городской тарзан" алаңы және Садовой,71 мекенжайындағы "Балдәурен" балалар алаңы. Біз Садовой көшесі 71-үйдің қасындағы ойын алаңына барып, көріп келдік. Тұрғындармен жүздесіп, ой-пікірін де жазып алдық.

– Ойын алаңының салынғаны жақсы болды. Немерем Таирды күнде далаға алып шығамын. Балалар демалыс күндері осы жерді думанға айналдырады. Бір "әттеген-айы", алаңның көлемі тар. Болашақта кеңейіп, бұдан да әдемілене түссе жақсы болар еді, – деді қала тұрғыны Айгүл Кушенова.

Былтыр "Халық қатысатын бюджет" жобасы аясында 2023 жылы жүзеге асыруға арналған 32 жобалық ұсыныс түскен. Оның 22-сі дауыс беру кезеңіне өтіп, 21-і биыл іске асырылмақшы. Бұл жобаларды жүзеге асыруға 387,2 млн теңге қарастырылып отыр.

Қымбат ДОСЖАНОВА

Суреттерді түсірген Бағдат АХМЕТБЕКОВ.