Ерлігі ел жадында
Биыл Дархан Базарбаевтың өмірден өткеніне үш жыл. Осыған байланысты Қостанай облысы ПД Дархан Базарбаевты еске алуға арналған бірқатар іс-шаралар ұйымдастырды.
Естеріңізге сала кетейік, Дархан Базарбаев 2020 жылы19 қаңтарда Қостанай облысында өз отбасын пышақтамақшы болған қаскөйдің қолынан қызметтік міндетін атқару кезінде қаза тапты. Қызметтік борышын орындау кезінде көрсеткен ерлігі үшін ҚР Президентінің Жарлығымен Дархан Базарбаев III дәрежелі "Айбын" орденімен (қайтыс болғаннан кейін) марапатталды.
Содан бері полицейлер үшін 19 қаңтар батырды еске алу күні болып қалды. Шара барысында Қостанай облысы ПД басшысы Ерлан Омарбеков Дархан Базарбаевтың есімі Департаменттің еске алу мемориалдарында және полиция бөлімдерінде мәңгі қалғанын атап өтті. Мұражайда, бөлімшелерде "Ерлік" бұрыштары ашылды, Дархан "Қостанай облысы жастарының Алтын кітабына"енгізілді. Өткен жылы ҚР ІІМ Ш.Қабылбаев атындағы Қостанай академиясында батыр атындағы аудитория ашылды. Бұл болашақ офицерлерді патриотизм мен батырлық рухында тәрбиелеуге мүмкіндік береді.
Іс шараға қаза тапқан полицейдің ата-анасы Серік Базарбайұлы мен Зәмзагүл Жақиқызы және ішкі істер органдарының ардагерлері қатысты.
– Үш жыл өтсе де Дарханның жоқтығы жүрекке ауыр тиеді. Ол әрқашан біздің есімізде қаһарман болып қалады. Отанға қызмет етудің және батылдықтың үлгісін көрсетті, – деп еске алады Дарханның әріптестері.
Бүгін полицейді еске алуға арналған волейбол турнирі өтуде.
