Қос ауыл ауыз сумен қамтылды
Соңғы кездері Сарыкөл ауданы бойынша ауыз су мәселесі оңтайлы шешімін тауып отыр. Жақында Қара-Оба ауылы мен Крылов елдімекенінің халқы қос қуаныштың куәсі болды.
Бұл ауылдарға қысқа мерізімде тартылған сапалы ауыз су «Ауыл – ел бесігі» мемлекеттік бағдарламасының аясында жергілікті биліктің мердігерлермен бірігіп атқарған жұмысының нәтижесінде жүзеге асырылды. Айта кетейік, Қара-Оба ауылына сапалы ауыз су сақтайтын мұнара салынса, ал Крылов ауылына үйді-үйге ауыз су тартылды.
Халықтың көптен күткен қуанышын бөлісуге аудан әкімі Амантай Балғарин арнайы барды.
-Соңғы кездері ел көлемінде ауылдық жерлердің инфрақұрылымын дамытуға зор көңіл бөлініп отыр. Бұл Мемлекет басшысының тапсырмасы аясында мемлекеттік бағдарламалар шеңберінде іске асырылуда. Жалпы, осындай ауылдық жерлерде әлеуметтік мәселелердің шешілуі халықтың өмір сүру деңгейін арттырады. Міне, бүгінгі судың келуі ауыл тұрғындары үшін өте қуанышты оқиға, – деп атап өтті Амантай Кәкімбекұлы.
Өркениетті өмір жайлылығын сезінген ауылдар – Қара-Оба мен Крыловтың тұрғындары да игілікті істердің атқарылып жатқанына дән риза. Ауылға ауыз судың келуі кәріні де жасты да қатты қуантып отыр.
– Біз үшін аса маңызды болып отырған ауыз су мәселесі өз шешімін тапты. Қуанышымызда шек жоқ. Осындай игілікті істің басы-қасында жүрген жергілікті билікке, әкімге және мердігерлерге зор алғыс айтқымыз келеді, – дейді Қара-Оба ауылының тұрғыны Тұрсынзада Әсембеков.
Айта кетейік, су құбырын тарту шаралары 8 ай уақыт аралығында жүргізілген. Қазіргі таңда Крылов ауылында 213 абонент таза тіршілік нәрімен қамтылған. Болашақта тұтынушылардың саны Қараоба елді мекенін қосқанда 1029 адамға жетпек. Ұзындығы 24 шақырым болатын ауыз су желісіне жұмсалған қаражат көлемі 578 млн теңгеге тең келеді.
Руслан ӘЛКЕЕВ.
Сарыкөл ауданы
