Тағзым белгісі, бірлік нышаны

Кешегі «қаңтар оқиғасы» жүрегімізді әлі сыздатады. Ынтымақ-бірлігімізге жік салғысы келген қаскүнемдер кесірінен қастерлі Тәуелсіздігімізге қатер төне жаздаған еді. Есеңгіреп қалған есіл ел бұл топалаңды қалайша тез ұмыта қойсын? Осынау алашапқында қаншама адам жазықсыз құрбан болды. Қаһармандықпен қаза тапқан жандардың да обалы – сол озбыр ойлы ойраншылдардың мойнында! Егемен елдің тарихына қара дақ түсірген, жұрт жүрегін үскіріктей қарып өткен бұл қасіретті оқиға "буынға біткен жарадай" жуырда жазыла қоймас… 
Бүгін Алматыда ашылған тағзым ескерткіші де осынау ұмытылмас ұлт трагедиясының мәңгілік белгісіне айналары сөзсіз. Кең ауқымды кешен «қаңтар оқиғасының» нақ эпицентрі – Республика алаңынан орын тауыпты.
Мемориалдың ашылу рәсіміне Мемлекет басшысы Қ.Тоқаев арнайы барып қатысты. «Қаңтар оқиғасында» қаза тапқан азаматтардың рухына тағзым жасады. Елдігіміз сынға түскен сол бір дүрбелеңнің себеп-салдары мен оның тәлім-сабағы туралы шешіле сөз сөйледі. Расымен де, көпсатылы сәулет кешені өскелең ұрпаққа елдегі бірлік пен тыныштықты насихаттап тұрар киелі орынға айналады десек болады. Бұл отандастарымызға Тәуелсіздіктің қадір-қасиетін ұғындыратын, оның көз қарашығындай сақтау қаншалықты қиын болса, алауыздық салдарынан әп сәтте уыстан шығарып алу да соншалық оп-оңай екенін ескертіп тұратын нышан іспетті. Сондықтан «Тағзым» ескерткішінің ашылуының тарихи, рухани мән-маңызы өте зор деп білемін!

 

Дәулет Жадырасын,

ақын, Қазақстан Жазушылар одағының мүшесі