Өзекті сауалдарға – тұшымды жауаптар

Елімізде болған қаңтар оқиғаларынан кейін ҚР Президенті Қасым-Жомарт Тоқаевтың орыс тіліндегі сұхбаты жарияланған еді. Одан кейін халық арасында «неге мемлекеттік тілде сұхбат бермейді?» деген сұрақ туындаған болатын. Бұл тұрғыдағы шүбәлі көзқарастар, сыпсың сөздер сейілді деп ойлаймын. Президенттің қазақ тілінде берген сұхбатында ел көкейіндегі жүрген көп сауалдарға тұшымды жауаптар берілді. Көп мәселе қамтылды. Ана тіліміз жайлы: «Бізден басқа ешкімге керегі жоқ. Сондықтан ең алдымен өзіміз оған құрмет көрсетуіміз керек. Тілімізді сақтаймыз… Күрделі кезеңдерде тіліміз аман қалды», – деген сөздерінен көп тілді меңгерген мемлекет басшысы үшін мемлекеттік тілдің орны ерекше екені айқын байқалады.

Сонымен қатар, сөз соңында ұлы Абай даналығынан мысал келтіріп, ел егемендігі мен өркендеуіне себеп болатын тұшымды ой білдірді. Қалың көпшіліктің арасындағы «Іргелес алпауыт мемлекеттің еліміздің солтүстік өңірлеріне көз алартуы мүмкін бе?» деген сұраққа да нақты жауап берілді. Мемлекет басшысы қаңтар оқиғаларына себеп болған өткір әлеуметтік мәселелер, теңсіздіктің белең алуы жайлы да сөз қозғады. Қазіргі таңда әлеуметтік желіде желдей есіп жүрген өзекті сұрақтардың бірі бейбіт шерушілер  мен кінәсіз азаматтардың хал-ахуалына қатысты еді. Президент барлық келеңсіз жайттардан хабардар екенін, әр істі мұқият қарау, қарақшылар мен қарапайым халықтың ара-жігін анықтау жайында құзырлы органдарға тиісті тапсырма бергенін мәлімдеді.

Сұхбат соңында Қасым-Жомарт Кемелұлы біздің бір ғана Отанымыз бар екенін екпін сала айтып, халықты ауызбірлік пен еңбекқорлыққа шақырды. Халқымыздың қауіпсіздігі мен еліміздің тұтастығына нұқсан келтіре жаздаған оқиғаға өз бағасын орынды берді деп ойлаймын. 

 

 Ерлан Әбілов,

«Қарабалық ауданы әкімдігінің тілдерді оқыту орталығы»

КММ басшысының міндетін атқарушы