Амангелді – 150: жоспар пысықталды

2023 жылы Ұлт-азаттық көтерілістің сардары, қазақ батыры Аманкелді Имановқа 150 жыл толмақ. Аудан әкімдігінде алдағы мерейтой жоспарын пысықтауға арналған жиын өтті. Жоспарды көпшілікке аудан әкімінің орынбасары Сүндет Жолдыбекұлы таныстырды.

— Алдағы міндет – ауқымды іс-шараны өткізіп, Амангелді атын жас ұрпақ жете білетіндей маңызды жобаларды іске асыру. Атап айтқанда, «Шұғыла» балалар-жасөспірімдер шығармашылық орталығы алдында орналасқан батыр ескерткішіне жөндеу жұмыстарын жүргізу қажет. Оған облыстық бюджеттен 71 млн теңге бөлінеді. Аудан орталығындағы бірнеше көшені қалыпқа келтіру де жоспарда бар. Олар – Дүйсенбина көшесі (12,227 млн), Ш.Уалиханов көшесі (38,457 млн), Н.Ахметбеков көшесі (17,660 млн), Б.Байқадамов көшесі (11,950 млн), Ю.Гордеев көшесі (20,402 млн), — деді орынбасар.

Жиналыста аудан әкімі Талғат Карбозов мерейтойға дайындықты осы бастан қолға алып, жандандыру керек екенін, барлық жерлесті осы іске атсалысуға шақырды. Қатысушы тараптар аудан әкімінің сөзін бір ауыздан қолдап, батырдың мерейтойын жақсы деңгейде өткізуге уағдаласты.

 

Бибіт НҰРМҰХАНОВ

Аманкелді ауданы