Қостанайда IT-тур басталды
Облыстың цифрландыру басқармасы IT саласының мамандары үшін ауқымды тур өткізіп жатыр. Іс-шара Ахмет Байтұрсынұлы атындағы ҚӨУ-де ректормен және студенттермен кездесуден басталды.
Қостанай облысында бизнеске қатысты идеяларды іске асыру, кездесулер мен ивенттер өткізу үшін бірқатар IT-қауымдастықтар құрылған. Ұйымдастырушылар осы турасында пікір білдіріп, жаңа бастамаларды қолдауға әзір екенін айтты.
"Біздің өңірде креатив жастар көп, зияткерлік әлеуеті жоғары. Сондықтан дәл осы IT және креатив индустриямен байланысты салалар сұраныста. Біз оларға қолдау көрсетуге дайынбыз", – деп атап өтті облыстың Цифрландыру басқармасының басшысы Азамат Кашиев.
Кездесу барысында ЖОО-ның басшылығы мен ІТ мамандары осы салада білікті кадрларды даярлау, өңірдің IT-компанияларында студенттердің болашақ тәжірибесі жөнінде мәселелерді талқылады. Жиыннан соң ІТ-қауымдастықтар облыстың барлық ірі кәсіпорындарына аралауға барды.
Сонымен қатар, облыстың IT-қоғамдастықтарының коворкинг-орталықтарында ЖОО студенттеріне арналған "Ашық есік күнін" өткізу жоспарланып отыр.
