Жаңа белес
Қостанай өңірінің «Алтынай» бишілер тобы Түркістаннан екі рет алтын медальмен оралды.
Ұжым келер жылы 20 жылдық мерейтойын атап өтеді. Негізгі бағыттары –классикалық, заманауи, және халық билері.
Қазан айының соңында Түркістан қаласында «Turkestan music festival» халықаралық байқауы өтті. Ол Қазақстанның түкпір-түкпірінен 65 шығармашылық ұжымның басын қосты.
Астана, Павлодар, Қарағанды, Тараз, Ақтөбе, Шымкент, Алматы, Хромтау қалаларының өнерпаздары бақ сынаған еді. Фестивальде Қостанай өңірінің атынан «Алтынай» халық би ансамблі қатысты.
Сайыс қорытындысында қостанайлық жас өнерпаздар (ең жас буын – 6-7 жас) қазақ халық биі мен заманауи би түрлерінен жүлделі орынға ие болды.
– Осындай фестивальдер мен байқаулардың арқасында балаларымыздың ой-өрісі кеңейіп, бәсекеге қабілетті рух пайда болып, тұлға ретінде өседі. Басқа жақтың жас буын өнерпаздарымен қарым-қатынас орната алады. Бұл жеңіс – ұжымның ортақ жетістігі, – дейді ансамбльдің ұстаз-тәлімгері Әсем Айтбаева.
Дильназ Изделюева,
3-курс студенті
