Қар бұрқасыны жол қатынасын қиындатты

Облыс көлеміндегі ауа райының күрт құбылуы салдарынан тас жолдарда бірнеше жол апаты болды.

Қостанай облысында қар жауып, қарбалас басталды. Қазір облыстық, республикалық маңызы бар тас жолдарды қардан тазалау жұмыстары белсенді жүргізіліп жатыр. Соған қарамастан, көліктер жол үстінде тайғанап, ауып құлап, жиектерге түсіп кеткен. Мұндай оқиғалардың фото-фидеолары әлеуметтік желілерде белсенді жарияланып жатыр.

«Мәселен, бүгін сағат 11.06-да Қостанай-Қарабұтақ тас жолының 127-шақырымында 40 жастағы автотасығыш жүргізушісі рөлді басқара алмай жыраға аударылды. Жүргізуші зардап шеккен жоқ. Қазіргі уақытта көлікті эвакуациялау жұмыстары жүргізілуде», – дейді облыстық ПД баспасөз қызметі.

Департаменттегілер жүргізушілерге қазіргі ауа райына байланысты жол қозғалысы ережелерін қатаң сақтауды ескертіп отыр. Бүгін облыс орталығында полицейлер дауыс зорайтқыш құрылғылары арқылы ескертпе жасаған.

Кейінірек облыстық ПД баспасөз қызметі өкілдері ауа райының нашарлай түсуіне байланысты Рудный-Қашар-Федоров тас жол жүк көліктері үшін жабылғанын хабарлады.