Кәсіпкер: «Мақсатым – қазақтың тәттілерін брендке айналдыру»

Жуырда Қостанай қаласында ұлттық тағамдар сататын тұңғыш дүкен ашылды. А.Байтұрсынұлы атындағы ҚӨУ Журналистика және коммуникациялық менеджмент кафедрасының аға оқытушысы, кәсіпкер Гүлнұр Өміржанқызы ұлттық тағамдарды брендке айналдырды десе болады.

«Менің бұл кәсіппен айналысып жатқаныма үшінші жыл. Басында отбасыма дайындап, әлеуметтік желілер арқылы тарата бастадым. Сұраныстар түсіп, кәсібім өрлей берді. Балаларым жент, тары, талқан сияқты тәттілерді жақсы көретін, бірақ қала ішінен бұл заттарды табу қиынға соғатын. Сөйтіп, ұлттық тәттілерді сататын дүкен неге ашпасқа деген ой келді. Ойым жүзеге асты», – дейді идея авторы Гүлнұр.

Қазақ халқының дәстүрі, киім үлгілері, әндері мен аспаптары туралы көп айтылады, бірақ ұлттық тәттілерді көп жағдайда кездестіре алмаймыз. Күнделікті өмірдегі дастархан басынан да бұл тағамдарды көре бермейміз. Тек дәстүрлі мерекелерде ғана қолданылады. Гүлнұр кейінгі жылдары тәттілерді қазақтар ғана емес, өзге ұлт өкілдері де сатып алатынын байқаған.

«Егер бұл іс арқылы ұлттық тағамдарға деген жұрттың көзқарасын өзгертуге бірден-бір себепкер болсақ, біз үшін, әрине, үлкен мәртебе. Қостанай қаласында осындай дүкендер көптеп ашылуға тиіс», – дегенді айтады кәсіпкер ханым.

Кез келген кәсіптің, жалпы жұмыстың өзіндік қиындықтары болады, оған төзсең, кәсібіңнің жемісін көресің. Бұл турасында ол: «Бұрын үйде жасап жүргенімде, күндіз негізгі жұмысыма барып, кешкілік балаларды мектепке даярлап, үйдің тірлігін бітірген соң ғана, түн уақытында тапсырыстарыма кірісетінмін. Күнделікті 2-3 сағат ұйықтап, сондай режим қалыптасып, біршама қиындықтар болды. Қазір дүкен ашылған сәттен бастап, қиындықтар біршама жеңілдей түсті. Тұтынушылардың тапсырысын қабылдап, көңілінен шығу, жарнамамен жұмыс істеу бағытында біраз еңбектендік. Алда жоспар көп, сәт түссе, оны да бөлісе жатармыз», – дейді.

Дильназ ИЗДЕЛЮЕВА,

Журналистика мамандығының 3 курс студенті