Stand Up – қалжың қазаны
14 қазан күні Қостанай өңірлік университетінің Ө.Сұлтанғазин атындағы педагогикалық институты қабырғасында Stand-Up шоуы өтті.
Stand Up – бұл комедия жанрында қоғамдағы проблеманы, өз өміріңді, айналадағы болып жатқан немесе болып кеткен дүниеге деген көзқарасты көрерменге әзіл арқылы жеткізу.
Жобаның мақсаты: көрерменді стендап жанры арқылы жақсылыққа, отбасын, жақындарын сүюге баулу және талантты комиктердің дамуына үлес қосу.
Бүгінде Stand Up – әзіл-сықақ шоуының қарқынды дамып келе жатқан бір түрі. Отаны – Ұлыбритания. Бұл жанрдың бастауы 18-19 ғасырларда, музыкалық залдарда көрермендерді музыканттар көңіл көтерген кезден бастау алады. Алайда, өткен ғасырдың ортасынан бастап музыкалық сүйемелдеу дәстүрі ескіріп, орнына әзілкештің жеке орындауы келді.
Қазақстанда бұл жанр осыдан бірнеше жыл бұрын ғана жандана бастады. Қазір елде Stand Up өтетін бірнеше алаңдар салынды. Белсенді даму үстінде. Әр қалада ашық микрофондар өткізілетін мекемелер мен көптеген талантты әртістер бар.
Қостанай қаласында Stand Up шоу қалыптасып, құрамына белсенді студенттер мен кәсіпті мамандарды жинауда.
Әзіл кешінің көрігін төрт жыл бойы қыздырып келе жатқан Артемий Аристов өз пікірін бөлісті.
«Бұл өнер түрін таңдауыма бойымдағы шығармашылық,белсенділік қасиеттері әсер етті деп ойлаймын. Stand Up жанры елімізде қалыптасқан кезінде мен де қалада осы салаға қызығатын адамдармен бірлесе сахналарда шоу ұйымдастыра бастадым. Сахнада айтылатын материалдарды біз өмірден алып, әзіл-сықаққа келтіріп жазамыз. Стэндаперде ең бастысы көрермендермен жұмыс істеу, сауатты сөйлеу сияқты қасиеттер болуы абзал. Материал жазу барысы қиын емес, тек тәжірибе керек, мәтіндерді ықшамдай, икемің келе бастайды. Сахна алдында әзілдеу, осы әзілдің көрерменнің көңілінен шығуы әрқайсымыз үшін маңызды. Әрине қобалжу барлығымызда бар, бірақ, айтып өткендей, көп тәжірибе керек, өз-өзіңді еркін ұстауға ұмтылу қажет. Осы саламен айналысқалы жүрген жастарға тек сәттілік және көрермен алдына шығудан қорықпай, жаңа белестерді бағындыруды тілеймін», – дейді Артемий.
Дильназ ИЗДЕЛЮЕВА,
журналистика мамандығының 3 курс студенті.
